ദേവികുളം: സംസ്ഥാനത്തെ ഏക ഗോത്രവര്ഗ്ഗ പഞ്ചായത്തായ ഇടമലക്കുടിയില് പഞ്ചായത്ത് ഓഫീസ് ആരംഭിക്കാത്തതില് പ്രതിഷേധിച്ച് ബിജെപിയുടെ നേതൃത്വത്തില് ഉപവാസ സമരം നടത്തി.
കാല്നടയായി മണിക്കൂറുകള് സഞ്ചരിച്ചാല് മാത്രമാണ് ഇടമലക്കുടിയിലെ വിവിധകുടികളില് എത്താനാവുകയുള്ളു. ഈ സാഹചര്യത്തിലും ഇടമലക്കുടിയുടെ പഞ്ചായത്ത് ഓഫീസ് പ്രവര്ത്തിക്കുന്നത് ദേവികുളം ക്യാമ്പ് ഓഫീസിന് സമീപമാണ്.
നിര്ദ്ധനരായ ഇടമലക്കുടി നിവാസികള് ഏറെ ദുരിതം സഹിച്ചാണ് ഇവിടെ തങ്ങളുടെ ആവശ്യങ്ങള്ക്കായി എത്തുന്നത്. ഇത്തരത്തില് എത്തുമ്പോള് സെക്രട്ടറി അടക്കമുള്ള ജീവനക്കാര് ആരും തന്നെ ഇവിടെ ഉണ്ടാകാറില്ല. ഏഴ് വര്ഷം മുമ്പ് ആരംഭിച്ച പഞ്ചായത്ത് ഓഫീസ് ഇവിടെ നിന്നും മാറ്റി ഇടമലക്കുടിയില് തന്നെ സ്ഥാപിക്കണമെന്നാവശ്യപ്പെട്ടാണ് ബിജെപി സമരവുമായി രംഗത്തെത്തിയത്.
ഇന്നലെ രാവിലെ ക്യാമ്പ് ഓഫീസിന് മുമ്പില് നടന്ന ഉപവാസ സമരം ജില്ലാ പ്രസിഡന്റ് ബിനു ജെ കൈമള് ഉദ്ഘാടനം ചെയ്തു. ഇടമലക്കുടിയിലെ ബിജെപി പഞ്ചായത്ത് അംഗങ്ങളായ ഷണ്മുഖം, കാശിരാമന്, മണികല എന്നിവര് സമരത്തിന് നേതൃത്വം നല്കി.
ബിജെപി ജില്ലാ ജന.സെക്രട്ടറി സോജന് ജോസഫ്, മണ്ഡലം ജന.സെക്രട്ടറിമാരായ സി എന് മധുസൂധനന്, സനീഷ് നെറ്റിപ്പാറ എന്നിവര് സംസാരിച്ചു. ഇടത് വലത് മുന്നണികള് മാറിമാറി ഭരിച്ചിട്ടും ഇടമലക്കുടി നിവാസികളുടെ ദീര്ഘകാലമായ ആവശ്യത്തിന് പരിഹാരം കാണാന് ശ്രമിച്ചിട്ടില്ലെന്ന് ബിനു ജെ കൈമള് കുറ്റപ്പെടുത്തി. സംഭവത്തില് ബിജെപി ശക്തമായ സമരവുമായി മുന്നോട്ടിറങ്ങുമെന്നും അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: