ന്യൂദല്ഹി: ലോകബാങ്കിന്റെ വായ്പാ നിഷേധം ഉള്പ്പെടെ നിരവധി കടമ്പകള് മറികടന്നാണ് ലോകത്തിലെ രണ്ടാമത്തെ വലിയ ഡാമായ സര്ദാര് സരോവറിന്റെ നിര്മ്മാണം പൂര്ത്തിയാക്കിയതെന്ന് പ്രധാനമന്ത്രി നരേന്ദ്രമോദി. ആറു പതിറ്റാണ്ട് മുമ്പ് ശിലാസ്ഥാപനം നിര്വഹിച്ച ഡാം നിര്മ്മാണം പൂര്ത്തീകരിക്കാനായി ഇന്ത്യയ്ക്ക് അവളുടെ രക്തവും വിയര്പ്പും ഒഴുക്കേണ്ടിവന്നെന്നും പ്രധാനമന്ത്രി പറഞ്ഞു. നര്മ്മദാ നദിയില് നിര്മ്മിച്ച ഡാമിന്റെ ഉദ്ഘാടനം നിര്വഹിച്ചു സംസാരിക്കുകയായിരുന്നു പ്രധാനമന്ത്രി മോദി.
പരിസ്ഥിതിക്ക് നാശം ഉണ്ടാകും എന്ന കാരണത്താലാണ് ലോകബാങ്ക് പദ്ധതിക്ക് ധനസഹായം നിഷേധിച്ചത്. ഇത്രവലിയ പദ്ധതി ഏറ്റെടുത്ത് നടത്താന് ഇന്ത്യയ്ക്ക് പ്രാപ്തിയില്ലെന്നും അവര് വിധിയെഴുതി. എന്നാല് ലോകബാങ്ക് സഹായമുണ്ടെങ്കിലും ഇല്ലെങ്കിലും ഡാം നിര്മ്മാണം മുന്നോട്ടു കൊണ്ടുപോവുകയെന്നത് ഇന്ത്യയുടെ തീരുമാനമായിരുന്നു. പദ്ധതിക്കെതിരെ ഗൂഢമായി പ്രവര്ത്തിച്ച ഓരോ വ്യക്തിയെയും എനിക്കറിയാം.
എന്നാല് അവരുടെ പേരുവിവരങ്ങള് വെളിപ്പെടുത്തേണ്ട കാര്യമില്ല. ഇത്രയധികം എതിര്പ്പ് നേരിട്ട് പൂര്ത്തിയാക്കിയ മറ്റൊരു പദ്ധതി ലോകത്തില്ല. സര്ദാര് സരോവര് പദ്ധതി പുതിയ ഇന്ത്യയുടെ ശക്തിയാണ് കാണിക്കുന്നത്. എഞ്ചിനീയറിങ് രംഗത്തെ മഹാത്ഭുതമാണ് സര്ദാര് സരോവര് ഡാം. എഞ്ചിനീയറിങ് വിദ്യാര്ത്ഥികള് പഠന വിഷയമായി ഡാം നിര്മ്മാണം മാറിയേക്കും.
സര്ദാര് വല്ലഭ്ഭായ് പട്ടേലും ബി. ആര് അംബേദ്ക്കറും കുറച്ചു നാള് കൂടി ജീവിച്ചിരുന്നെങ്കില് ഡാം നിര്മ്മാണം അറുപതുകളിലോ എഴുപതുകളിലോ പൂര്ത്തിയായേനെയെന്നും പ്രധാനമന്ത്രി പറഞ്ഞു. ഡാമിനുള്ളിലെ ദ്വീപായ സാധു ബെത്തില് നിര്മ്മാണം പുരോഗമിക്കുന്ന 182 മീറ്റര് ഉയരമുള്ള വല്ലഭ്ഭായ് പട്ടേല് പ്രതിമാ നിര്മ്മാണവും ഉദ്ഘാടനത്തിന് മുമ്പായി പ്രധാനമന്ത്രി സന്ദര്ശിച്ചു. കേന്ദ്രഗതാഗതമന്ത്രി നിതിന് ഗഡ്ക്കരി, ഗുജറാത്ത് മുഖ്യമന്ത്രി വിജയ് രൂപാനി എന്നിവരും പ്രധാനമന്ത്രിക്കൊപ്പമുണ്ടായിരുന്നു.
1961 ഏപ്രില് 15ന് പ്രധാനമന്ത്രി ജവഹര്ലാല് നെഹ്റു ശിലാസ്ഥാപനം നിര്വഹിച്ച സര്ദാര് സരോവര് ഡാം നിര്മ്മാണം മേധാ പട്ക്കറിന്റെ നേതൃത്വത്തിലുള്ള നര്മ്മദാ ബച്ചാവോ ആന്തോളന് അടക്കമുള്ള സംഘടനകളുടെ എതിര്പ്പിനെ തുടര്ന്നാണ് അനന്തമായി നീണ്ടത്. 1.2 കിലോമീറ്റര് നീളവും 163 മീറ്റര് ഉയരവുമുള്ള ഡാം വഴി ഗുജറാത്തിലെ 18 ലക്ഷം ഹെക്ടര് പ്രദേശത്ത് ജലസേചനം ലഭ്യമാക്കാനാവും.
കനാല് സംവിധാനം വഴി 9,000 ഗ്രാമങ്ങളിലാണ് ജലമെത്തുന്നത്. മധ്യപ്രദേശ്, മഹാരാഷ്ട്ര, രാജസ്ഥാന് തുടങ്ങിയ സമീപ സംസ്ഥാനങ്ങള്ക്കും ഡാമിലെ ജലം ലഭ്യമാകും. ഗുജറാത്തിലെ പാക് അതിര്ത്തി മേഖലയിലെ ബിഎസ്എഫ് പോസ്റ്റുകളിലേക്കും സര്ദാര് സരോവറിലെ ജലം എത്തിക്കുന്നുണ്ട്.
പ്രതികരിക്കാൻ ഇവിടെ എഴുതുക: