തിരുവനന്തപുരം: പോലീസ് വിവരങ്ങള്ക്കും അടിയന്തിര സഹായത്തിനുമായി മൊബൈല് ഫോണിലും സംവിധാനം. ഇതിനുള്ള മൊബൈല് ആപ്ലിക്കേഷന് പരീക്ഷണാടിസ്ഥാനത്തില് നിലവില് വന്നു. ‘രക്ഷ’ എന്ന മൊബൈല് ആപ്ലിക്കേഷന് ഗൂഗിള് പ്ലേ സ്റ്റോറില് നിന്ന് ഡൗണ്ലോഡ് ചെയ്യാം. സുരക്ഷയ്ക്കും ട്രാഫിക് ബോധവത്കരണത്തിനുമായി മൂന്നു മൊബൈല് ആപ്പുകളും ഇതോടൊപ്പം പരീക്ഷണാടിസ്ഥാനത്തില് തയ്യാറാക്കിയിട്ടുണ്ട്.
ആന്ഡ്രോയിഡ്/ഐഒഎസ് പ്ലാറ്റ്ഫോമുകളില് പ്രവര്ത്തിക്കുന്ന ഈ മൊബൈല് ആപ്പ് പോലീസ് ഇന്ഫര്മേഷന് സെന്ററിന്റെ മേല്നോട്ടത്തില് കേരള സ്റ്റാര്ട്ട് അപ് മിഷന്വഴിയാണ് രൂപകല്പന ചെയ്തിരിക്കുന്നത്. ഗൂഗിള് പ്ലേസ്റ്റോറില് നിന്ന് നേരിട്ടോ https://play.google.com/store/apps/detailsid.org.keralapolice.raksha എന്ന ലിങ്കില് നിന്നോ രക്ഷ ഡൗണ്ലോഡ് ചെയ്യാം.
സ്റ്റേഷന് എസ്എച്ച്ഒമാര് മുതല് സംസ്ഥാന പോലീസ് മേധാവി വരെയുള്ളവരുടെ ഫോണ് നമ്പരുകള്, വിവിധ യൂണിറ്റുകളിലെ ഫോണ് നമ്പരുകള് ഉള്പ്പെടെയുള്ള പോലീസ് ടെലിഫോണ് ഡയറക്ടറി ഇതില് ലഭ്യമാണ്. ഇതിലൂടെ എല്ലാ പോലീസ് ഓഫീസുകളിലേക്കും ബന്ധപ്പെടാം. എമര്ജന്സി ഹെല്പ്പ്ലൈന് നമ്പരുകള്, സ്ത്രീ സുരക്ഷാനിര്ദ്ദേശങ്ങള്, പോലീസ് വാര്ത്തകള്, അറിയിപ്പുകള്, ഗതാഗതസുരക്ഷാ നിര്ദ്ദേശങ്ങള്, ജനങ്ങള്ക്കുള്ള ജാഗ്രതാ നിര്ദ്ദേശങ്ങള് തുടങ്ങിയവയും ഇതില് ലഭിക്കും.
പാസ്സ്പോര്ട്ട് വെരിഫിക്കേഷന് സ്റ്റാറ്റസ്, എഫ്ഐആര് ഡൗണ്ലോഡ് ചെയ്യല്, പെറ്റീഷന്റെ നിലവിലുള്ള സ്ഥിതി തുടങ്ങി വെബ്സൈറ്റില് ലഭ്യമായ ഇ-സര്വ്വീസുകളിലേക്കുള്ള ലിങ്കുകളും ഇതില് ലഭ്യമാണ്. പൊതുജനങ്ങളില് നിന്നുള്ള നിര്ദ്ദേശങ്ങള്കൂടി സ്വീകരിച്ച് രക്ഷ ഉള്പ്പെടെയുള്ള മൊബൈല് ആപ്ലിക്കേഷനുകള് മെച്ചപ്പെടുത്തി അന്തിമ രൂപത്തില് പുറത്തിറക്കുമെന്ന് സംസ്ഥാന പോലീസ് മേധാവി ലോക്നാഥ് ബെഹ്റ അറിയിച്ചു.
ഒക്ടോബര് മൂന്നുവരെ ഇതിനായുള്ളനിര്ദ്ദേശങ്ങള് [email protected], [email protected], [email protected], [email protected] എന്നീ ഇ-മെയില് വിലാസങ്ങളിലേക്ക് അയയ്ക്കാം.
പ്രതികരിക്കാൻ ഇവിടെ എഴുതുക: