ചെന്നൈ: രാഷ്ട്രീയത്തില് വിജയിക്കണമെങ്കില് പണവും പ്രശസ്തിയും മാത്രം പോരെന്ന് രജനീകാന്ത്. കമല്ഹാസന്റെ സാന്നിധ്യത്തിലുള്ള രജനിയുടെ ഈ പ്രസ്താവന കമലിനുള്ള പരോക്ഷമായ ഉപദേശമാണെന്നും വിലയിരുത്തപ്പെടുന്നു.
ചെന്നൈയില് ശിവാജി ഗണേശന് സ്മാരകത്തിന്റെ ഉദ്ഘാടന ചടങ്ങില് സംസാരിക്കുകയായിരുന്നു രജനി. കമലും വേദിയിലുണ്ടായിരുന്നു.
ഇതിഹാസ നായകനായ ശിവാജി ഗണേശന് തന്റെ ജീവിതത്തിലൂടെ രാഷ്ട്രീയത്തിലെ വിലയേറിയ പാഠങ്ങള് അനുയായികളെ പഠിപ്പിച്ചിട്ടുണ്ടെന്ന് പറഞ്ഞാണ് രജനി തുടങ്ങിയത്. രാഷ്ട്രീയത്തിലിറങ്ങിയ ശിവാജി ഗണേശന് പരാജയപ്പെടുകയായിരുന്നു. രാഷ്ട്രീയത്തില് വിജയിക്കണമെങ്കില് പണവും പ്രശസ്തിയും മാത്രം പോരാ മറ്റു പലതും വേണം, അതെന്താണെന്ന് ജനങ്ങളാണ് തീരുമാനിക്കുക.
ഒരു നടനെ രാഷ്ട്രീയക്കാരനാക്കി പരിവര്ത്തനപ്പെടുത്തുന്ന ഘടകങ്ങള് അതിലുമൊക്കെ മേലെയാണ്. ഒരു പക്ഷേ കമലിന് അത് അറിയാമായിരിക്കും. രണ്ടു മാസം മുന്പ് ചോദിച്ചിരുന്നെങ്കില് അദ്ദേഹമത് ഞാനുമായി പങ്കുവച്ചേനെ. ഇപ്പോള് അതേ ചോദ്യം ഞാന് ഉയര്ത്തുമ്പോള്, കൂടെ വരൂ, പറഞ്ഞു തരാം എന്നാണ് കമലിന്റെ മറുപടി, രജനി തമാശരൂപേണ പറഞ്ഞു.
ശിവാജി ഗണേശന്റെ സ്മാരകത്തിന്റെ ഉദ്ഘാടനം വൈകുന്നതിനെതിരെ കഴിഞ്ഞ ജൂലൈയില് എഐഎഡിഎംകെ സര്ക്കാരിനെതിരെ രൂക്ഷമായ വിമര്ശനവുമായി കമല് രംഗത്തെത്തിയിരുന്നു. രാഷ്ട്രീയത്തിനുമപ്പുറത്തേക്ക് വ്യക്തിപ്രഭാവവും പ്രശസ്തിയും വ്യാപിപ്പിച്ച വ്യക്തിയായിരുന്നു ശിവാജി ഗണേശനെന്ന് കമല് പറഞ്ഞു.
പ്രതികരിക്കാൻ ഇവിടെ എഴുതുക: