പാനൂര്: ജനരക്ഷായാത്രയുടെ വിജയത്തില് വിറളി പിടിച്ച സിപിഎം അക്രമത്തിനു കോപ്പുകൂട്ടുകയാണെന്ന് ബിജെപി ജില്ലാപ്രസിഡണ്ട് പി.സത്യപ്രകാശ് പറഞ്ഞു. പത്തായക്കുന്നില് ബിജെപി ഓഫീസിനു നേരെ നടന്ന അക്രമത്തില് പ്രതിഷേധിച്ച് പത്തായക്കുന്ന് ടൗണില് സംഘടിപ്പിച്ച പ്രതിഷേധ കൂട്ടായ്മ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സമാധാനം നിലനില്ക്കുന്ന പ്രദേശമാണിത്. ഇവിടെ പ്രകോപനം സൃഷ്ടിച്ച് സംഘര്ഷമുണ്ടാക്കാന് ഒരുപാട് കാലമായി സിപിഎം ശ്രമിക്കുകയാണ്. ജനരക്ഷായാത്രയുടെ ഭാഗമായി ജില്ലയില് നാട്ടിയ ബോര്ഡുകള് മോഷ്ടിച്ച് കൊണ്ടുപോകുകയാണ് സിപിഎം ചെയ്തത്. ആയിരത്തോളം ബോര്ഡുകളാണ് മോഷണം പോയിട്ടുളളത്. ഭരണപക്ഷത്തിന്റെ ദാസ്യവേലക്കാരായി പല പോലീസ് ഉദ്യോഗസ്ഥരും മാറുകയാണ്. സിപിഎമ്മിന്റെ ആജ്ഞാനുവര്ത്തികളായി പോലീസ് മാറുന്നത് അപകടകരമായ സ്ഥിതി വിശേഷത്തിലേക്ക് ജില്ലയെ കൊണ്ടെത്തിക്കുമെന്നും സമാധാനമാണ് ബിജെപി ആഗ്രഹിക്കുന്നതെന്നും സിപിഎം അക്രമത്തെ ജനാധിപത്യ മാര്ഗത്തില് നേരിടുമെന്നും അദ്ദേഹം തുടര്ന്നു പറഞ്ഞു. ബിജെപി മൊകേരി പഞ്ചായത്ത് പ്രസിഡണ്ട് പി.സുധീര് അദ്ധ്യക്ഷത വഹിച്ചു. മണ്ഡലം പ്രസിഡണ്ട് സി.കെ.കുഞ്ഞിക്കണ്ണന്, ജനറല് സെക്രട്ടറിമാരായ കെകെ.ധനഞ്ജയന്, രാജേഷ് കൊച്ചിയങ്ങാടി, മഹിളാമോര്ച്ച ജില്ലാ അദ്ധ്യക്ഷ എന്.രതി, കെ.കാര്ത്തിക, ആര്.വി.ശശിധരന് തുടങ്ങിയവര് പ്രസംഗിച്ചു. കെ.അജേഷ് സ്വാഗതം പറഞ്ഞു. കെ.ഷംജിത്ത്, ടി.ഷിബു, പ്രണുബ് എന്നിവര് കൂട്ടായ്മയ്ക്കു നേതൃത്വം നല്കി.
പ്രതികരിക്കാൻ ഇവിടെ എഴുതുക: