പാലാ: അറുപത്തിയൊന്നാമത് സംസ്ഥാന സ്കൂള് കായികോത്സവത്തിന്റെ രണ്ടാം ദിനം മൂന്നുപേര് ഇരട്ട സ്വര്ണ്ണത്തിന് അവകാശികളായി. സീനിയര് പെണ്കുട്ടികളുടെ വിഭാഗത്തില് കോതമംഗലം മാര്ബേസില് എച്ച്എസ്എസിലെ അനുമോള് തമ്പി, ജൂനിയര് ആണ്കുട്ടികളില് കെ.എം. ശ്രീകാന്ത്, സീനിയര് ആണ്കുട്ടികളില് അലക്സ് പി. തങ്കച്ചന്, അനന്തുവിജയന് എന്നിവരാണ് ഇരട്ട സ്വര്ണ്ണത്തിന് അവകാശികളായത്.
ആദ്യദിനം ദേശീയ റെക്കോഡിനെക്കാള് മികച്ച സമയത്തില് ് സീനിയര് പെണ്കുട്ടികളുടെ 3000 മീറ്ററില് ഒന്നാമതെത്തിയ അനുമോള് രണ്ടാംദിനം 5000 മീറ്ററിലും ഒന്നാമതെത്തി ഇരട്ടസ്വര്ണം പൂര്ത്തിയാക്കി. 17 മിനിറ്റ് 18.69 സെക്കന്ഡിലാണ് അനുമോള് അവസാനവരതൊട്ടത്. രണ്ടാമതെത്തിയ കെ ആര് ആതിരയെക്കാള് ഒരു ലാപ് മുന്നിലായിരുന്നു അനുമോളുടെ ഫിനിഷ്. ഇനി 1500 മീറ്ററിലും മത്സരിക്കാനിറങ്ങുന്ന അനുമോള് ട്രിപ്പിള് സ്വര്ണ്ണമാണ് ലക്ഷ്യമിടുന്നത്.
3000 മീറ്റിലെ ആദ്യ മൂന്ന് സ്ഥാനക്കാര് തന്നെയാണ് 5000മീറ്ററിലും മെഡല്പ്പട്ടികയില് എത്തിയത്. അതും ക്രമംതെറ്റാതെ. കോഴിക്കോട് കട്ടിപ്പാറ ഹോളി ഫാമിലി ഹൈസ്കൂളിലെ കെ.ആര്. ആതിര 18:25.57 സെക്കന്ഡില് വെള്ളിയും പാലക്കാട് കല്ലടി സ്കൂളിന്റെ പി.വി. ശാലു 18:27.13 സെക്കന്ഡില് വെങ്കലവും നേടി.
സീനിയര് ആണ്കുട്ടികളുടെ വിഭാഗത്തിലെ ഷോട്ട്പുട്ടില് ഒന്നാമതെത്തിയാണ് അലക്സ് പി. തങ്കച്ചന് ഇരട്ട സ്വര്ണ്ണത്തിന് അവകാശിയായത്. കഴിഞ്ഞ ദിവസം ഡിസ്ക്കസ്ത്രോയിലും അലക്സ് പൊന്നണിഞ്ഞിരുന്നു. 14.13 മീറ്റര് എറിഞ്ഞാണ് അലക്സ് ഷോട്ട്പുട്ടില് പൊന്നണിഞ്ഞത്. എറണാകുളം മാതിരപ്പിള്ളി ജിവിഎച്ച്എസ്എസ് സ്കൂളിലെ അന്ഫാസ് വെള്ളിയും തിരുവനന്തപുരം സായിയിലെ എസ്.എസ്. അര്ജുന് വെങ്കലവും നേടി.
മീറ്റിന്റെ ആദ്യ ദിനം 400 മീറ്ററില് പൊന്നണിഞ്ഞ പത്തനംതിട്ട ഇരവിപേരൂര് സെന്റ് ജോണ്സ് എച്ച്എസ്എസിലെ അനന്തു വിജയന് 400 മീറ്റര് ഹര്ഡില്സിലും ഒന്നാമതെത്തി ഇരട്ട സ്വര്ണ്ണത്തിന് അവകാശിയായി. 55.30 സെക്കന്ഡിലാണ് അനന്തു അനായാസം സ്വര്ണ്ണത്തിലേക്ക് കുതിച്ചത്. തിരുവനന്തപുരം സായിയിലെ അക്ഷയ്. എന്.എസ് 55.73 സെക്കന്ഡില് വെള്ളിയും കോതമംഗലം മാര്ബേസില് എച്ച്എസ്എസിലെ സേതുനാഥ് വി. സത്യന് 56.03 സെക്കന്ഡില് വെങ്കലവും നേടി.
ജൂനിയര് ആണ്കുട്ടികളില് കഴിഞ്ഞ ദിവസം മീറ്റ് റെക്കോഡോടെ പൊന്നണിഞ്ഞ എറണാകുളം മണീട് ഗവ. വിഎച്ച്എസ്എസിലെ കെ.എം. ശ്രീകാന്താണ് ഇരട്ട സ്വര്ണ്ണം നേടിയ മറ്റൊരു താരം. ആദ്യ ദിവസം ലോങ്ജമ്പില് പൊന്നണിഞ്ഞ ശ്രീകാന്ത് ഇന്നലെ ഹൈജമ്പിലും ഒന്നാമതെത്തി. 1.95 മീറ്റര് ഉയരമാണ് ശ്രീകാന്ത് താണ്ടിയത്. മലപ്പുറം കടക്കാശ്ശേരി ഐഡിയല് ഇഎംഎച്ച്എസ്എസിന്റെ അബ്രിന് കെ. ബാബു 1.89മീറ്റര് ചാടി വെള്ളിയും തൃശൂര് പൊയ്യ എകെഎംഎച്ച്എസ്എസിലെ ദീപേഷ്. എം.എസ് 1.89 മീറ്റര് തന്നെ താണ്ടി വെങ്കലം നേടി.
പ്രതികരിക്കാൻ ഇവിടെ എഴുതുക: