തിരുവനന്തപുരം: വടക്കേനടയ്ക്കു സമീപമുള്ള റോഡിലെ ഓടകളുടെ സ്ലാബുകള് ഇളക്കി മാറ്റിയത് പുനഃസ്ഥാപിക്കാത്തതിനാല് ഗതാഗതക്കുരുക്ക് രൂക്ഷമായി. ശ്രീപദ്മനാഭസ്വാമി ക്ഷേത്രത്തിലെ അല്പശി ഉത്സവം തുടങ്ങുന്നതിനു മുമ്പ് ഓട വൃത്തിയാക്കാനായാണ് സ്ലാബുകള് ഇളക്കിമാറ്റിയത്. എന്നാല് പണി ഇഴഞ്ഞു നീങ്ങുന്നതിനാല് ആ ഭാഗത്തുകൂടിയുള്ള യാത്രദുഷ്കരമായി തുടരുകയാണ്. അല്പശി ഉത്സവത്തോടനുബന്ധിച്ചുള്ള ഭക്തജനത്തിരക്ക് വകവയ്ക്കാതെയാണ് നഗരസഭാധികൃതര് പണി പൂര്ത്തിയാക്കി ഗതാഗതം സുഗമമാക്കാത്തത്. ഇതുമൂലം കാല്നടയാത്രക്കാര് റോഡില്ക്കൂടി നടക്കേണ്ട ഗതികേടിലാണ്. യാത്രക്കാരും വാഹനങ്ങളും അപകടത്തില്പ്പെടുന്നതിനുള്ള സാധ്യത കൂടുതലാണ്. കൂടാതെ ഓടയിലെ ദുര്ഗന്ധവും യാത്രക്കാരെയും സമീപത്തുള്ള വ്യാപാരികളെയും വലയ്ക്കുന്നു. രാത്രിയില് ഇതുവഴി പോകുന്ന യാത്രക്കാര് അപകടത്തില്പ്പെടുന്നത് പതിവാണ്. അല്പശിഉത്സവം നടക്കുന്നവേളയില് എത്രയുംവേഗം പണിപൂര്ത്തിയാക്കി ഓട സ്ലാബിട്ടു മൂടി ഗതാഗതം സുഗമമാക്കണമെന്ന് ഭക്തജനസമിതി ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: