കോട്ടയം: സംസ്ഥാന സിബിഎസ്ഇ അത്ലറ്റിക്സ് ചാമ്പ്യന്ഷിപ്പ് 26 മുതല് 29 വരെ പാലാ മുനിസിപ്പല് ഗ്രീന്ഫീല്ഡ് സിന്തറ്റിക് ട്രാക്കില് നടക്കും. 1200 സ്കൂളുകളില് നിന്നായി 3000 കായികതാരങ്ങള് പങ്കെടുക്കും. കൂത്താട്ടുകുളം മേരിഗിരി പബ്ലിക്സ്കൂളിന്റെ ആതിഥേയത്വത്തില് ഗാലോപ്പ്- 2017 എന്ന പേരിലാണ് ചാമ്പ്യന്ഷിപ്പ് സംഘടിപ്പിക്കുന്നത്.
26ന് രാവിലെ 8.30 മുതല് സിന്തറ്റിക്ട്രാക്ക് പവലിയനില് രജിസ്ട്രേഷന് ആരംഭിക്കും. ഉച്ചകഴിഞ്ഞ് 3ന് സ്കൂളുകളുടെ മാര്ച്ച്പാസ്റ്റ് ആരംഭിക്കും. തുടര്ന്ന് 3.45ന് കായികമേളയുടെ ഉദ്ഘാടനം കേരളസ്പോര്ട്സ് കൗണ്സില് എലൈറ്റ് കൊച്ച് പി.ബി. ജയകുമാര് നിര്വ്വഹിക്കും. സംഘാടകസമിതി ചെയര്മാന് ജോസ് കെ മാണി എംപി സന്ദേശം നല്കും. ദ്രോണാചാര്യ അവാര്ഡ് ജേതാവ് സണ്ണി തോമസ് മുഖ്യപ്രഭാഷണം നടത്തും.
27ന് രാവിലെ 9മുതല് മത്സരങ്ങള് തുടങ്ങും. 66 ഇനങ്ങളിലാണ് മത്സരങ്ങള്. 100 ഒഫിഷ്യലുകള് മത്സരങ്ങള് നിയന്ത്രിക്കും. പാലായില് ആദ്യമായാണ് സിബിഎസ്ഇ സംസ്ഥാന മീറ്റ് നടക്കുന്നത്.
ഓര്ഗനൈസിംഗ് സെക്രട്ടറിയും മേരിഗിരി പബ്ലിക് സ്കൂള് പ്രിന്സിപ്പാളുമായ ഫാ. ഫിജി നടുവിലേത്തറയില്, സ്കൂള് അഡ്മിനിസ്ട്രേറ്റര് ഫാ. ജോജോ മറ്റത്തില്, ജോയിന്റ് സെക്രട്ടറി ഫാ. ജോഷി മടുക്കയില്, ജനറല് കണ്വീനര് ബിപിന് ബേബി എന്നിവര് പത്രസമ്മേളനത്തില് പങ്കെടുത്തു.
പ്രതികരിക്കാൻ ഇവിടെ എഴുതുക: