ആലപ്പുഴ: കള്ളക്കടത്ത്, ഭൂമാഫിയകളായ മന്ത്രിമാരെയും എംഎല്എമാരെയും സംരക്ഷിക്കുന്ന സര്ക്കാരിനെതിരെ ശക്തമായ പ്രക്ഷോഭങ്ങള് സംഘടിപ്പിക്കാന് ബിജെപി സംസ്ഥാന സമിതി തീരുമാനിച്ചു. കരിപ്പൂര് സ്വര്ണ്ണക്കടത്ത് കേസില് പുനരന്വേഷണം വേണമെന്നും ബിജെപി ആവശ്യപ്പെട്ടു. ഇക്കാര്യം ആവശ്യപ്പെട്ട് നവംബര് 15 ന് കോഴിക്കോട്ട് ബഹുജനസമരം നടത്തും.
കേസിലെ ഒന്നാം പ്രതിയുടെ വെളിപ്പെടുത്തലിന്റെ അടിസ്ഥാനത്തില് പിടിഎ റഹിം എംഎല്എയെയും റസാക്ക് കാരാട്ട് എംഎല്എയെയും ചോദ്യം ചെയ്യണമെന്ന് സംസ്ഥാന സമിതി തീരുമാനങ്ങള് വിശദീകരിച്ച് ജനറല് സെക്രട്ടറി കെ. സുരേന്ദ്രന് പത്രസമ്മേളനത്തില് ആവശ്യപ്പെട്ടു. കോഫേപോസെ നിയമ പ്രകാരം പോലീസ് അന്വേഷിക്കുന്ന പ്രതികളുമായി കൂടിക്കാഴ്ച നടത്തിയ എംഎല്എമാര് ഭരണഘടനാ ലംഘനവും സത്യപ്രതിജ്ഞാ ലംഘനവും നടത്തി.
ഇവരെ പുറത്താക്കണം. ഭൂപരിധി നിയമം മറികടന്ന് നൂറുകണക്കിന് ഏക്കര് ഭൂമി കൈവശം വച്ചിരിക്കുന്ന പി.വി. അന്വര് എംഎല്എയ്ക്കെതിരെ കേസെടുക്കണം. മാഫിയകളേയും കള്ളക്കടത്തുകാരെയും സംരക്ഷിക്കുന്ന ഇടതു മുന്നണിയുടെ രാഷ്ട്രീയ നിലപാടാണ് ഇവരുടെ ധാര്ഷ്ട്യത്തിന് കാരണം.
ഇടതുമുന്നണി നടത്തുന്ന പ്രചരണ ജാഥ കള്ളക്കടത്ത് സ്പോണ്സേര്ഡ് ജാഥയായി മാറി. നിയമലംഘടനം നടത്തിയ മന്ത്രി തോമസ് ചാണ്ടിയെ സംരക്ഷിക്കുന്നത് മുഖ്യമന്ത്രി പിണറായി വിജയനാണ്. തോമസ് ചാണ്ടി രാജിവക്കും വരെ ബിജെപി പ്രക്ഷോഭം തുടരും. തോമസ് ചാണ്ടിയുടെ രാജി ആവശ്യപ്പെട്ട് നവംബര് 13 ന് ബിജെപി സെക്രട്ടറിയേറ്റ് ഉപരോധം സംഘടിപ്പിക്കുമെന്നും സുരേന്ദ്രന് അറിയിച്ചു.
സോളാര് അഴിമതിയുമായി ബന്ധപ്പെട്ട് കേരളത്തില് ഇപ്പോള് നടക്കുന്നത് ഒത്തുതീര്പ്പ് രാഷ്ട്രീയത്തിന്റെ രണ്ടാം ഘട്ടമാണ്. റിപ്പോര്ട്ട് കിട്ടിയപ്പോള് ദ്രുതഗതിയില് നടപടി പ്രഖ്യാപിച്ച മുഖ്യമന്ത്രി ഇപ്പോള് മൗനം പാലിക്കുന്നത് ദുരൂഹമാണ്. യുഡിഎഫ് നേതാക്കള്ക്കെതിരെ നടപടി സ്വീകരിക്കുന്നതില് നിന്ന് ആരാണ് മുഖ്യമന്ത്രിയെ വിലക്കുന്നതെന്ന് പറയണം.
ജിഹാദി ഭീകരരെപ്പറ്റി ബിജെപി ഉന്നയിച്ച ആരോപണങ്ങള് ശരിയാണെന്ന് സമീപകാല സംഭവങ്ങള് തെളിയിക്കുന്നു. സിപിഎം ശക്തികേന്ദ്രങ്ങള് ജിഹാദി ഭീകരരുടെ താവളമായി മാറിയിരിക്കുന്നു. നവംബര് 8 കള്ളപ്പണ വിരുദ്ധ ദിനമായി ആചരിക്കും.
ഇതിന്റെ ഭാഗമായി ഏഴിന് തിരുവനന്തപുരത്ത് ദേശീയ സെമിനാര് സംഘടിപ്പിക്കാനും പാര്ട്ടി തീരുമാനിച്ചു. ജനരക്ഷായാത്ര വന് വിജയമായതായി സംസ്ഥാന സമിതിയോഗം വിലയിരുത്തി. സംസ്ഥാന വക്താവ് എംഎസ് കുമാര്, ജില്ലാ അദ്ധ്യക്ഷന് കെ. സോമന് എന്നിവരും പങ്കെടുത്തു.
പ്രതികരിക്കാൻ ഇവിടെ എഴുതുക: