കണ്ണൂര്: മലബാര് കാന്സര് കെയര് സൊസൈറ്റിയുടെ നേതൃത്വത്തില് നടന്ന സമഗ്ര സ്തനാര്ബുദ നിയന്ത്രണ ബോധവത്കരണ വാരാചരണത്തിന്റെ ഭാഗമായി ജില്ലയിലെ 12 കേന്ദ്രങ്ങളില് സംഘടിപ്പിച്ച ഫ്ളാഷ് മോബ് ശ്രദ്ധേയമായി. ബോധവത്കരണ സന്ദേശമുയര്ത്തി ബ്രസ്റ്റ് കാന്സര് ബ്രിഗേഡ് വളണ്ടിയര്മാരുടെ നേതൃത്വത്തിലാണ് ഫ്ളാഷ് മോബ് സംഘടിപ്പിച്ചത്. മട്ടന്നൂരില് പഴശ്ശിരാജ എന്എസ്എസ് കോളേജ് വിദ്യാര്ത്ഥികളും മാഹിയില് തലശ്ശേരി കോളേജ് ഓഫ് എഞ്ചിനിയറിങ്ങിലെ വിദ്യാര്ത്ഥികളും തലശ്ശേരിയില് തലശ്ശേരി ഗവ.ബ്രണ്ണന് ബിഎഡ് കോളേജിലെ വിദ്യാര്ത്ഥികളും കണ്ണൂര് പഴയ ബസ് സ്റ്റാന്റ് പരിസരത്ത് കൃഷ്ണമേനോന് വനിതാ കോളേജ് വിദ്യാര്ത്ഥികളും കല്യാശ്ശേരിയില് കല്യാശ്ശേരി ഗവ ജിഎച്ച്എസ് എന്എസ്എസ് യൂണിറ്റ് വിദ്യാര്ത്ഥികളും തളിപ്പറമ്പില് സര്സയ്യിദ് കോളേജ് വിദ്യാര്ത്ഥികളും പയ്യന്നൂര്, എടാട്ട്, പിലാത്തറ എന്നിവിടങ്ങളില് പയ്യന്നൂര് കോളേജ് വിദ്യാര്ത്ഥികളും കരിവെള്ളൂര്, പെരുമ്പ എന്നിവടങ്ങളില് കോറോം ഗവ.റസിഡന്ഷ്യല് വുമണ്സ് പോളിടെക്നിക്ക് വിദ്യാര്ത്ഥികളും കൂത്തുപറമ്പില് റാണി ജയ് എച്ച്എസ്എസിലെ വിദ്യാര്ത്ഥികളുമാണ് ഫ്ളാഷ് മോബ് സംഘടിപ്പിച്ചത്.
ബ്രസ്റ്റ് കാന്സര് ബ്രിഗേഡ് പദ്ധതിയുടെ തുടര്പ്രവര്ത്തനവുമായി പരിശീലനം നല്കിയ വളണ്ടിയര്മാരുടെ നേതൃത്വത്തില് തെരഞ്ഞെടുത്ത പഞ്ചായത്ത്, നഗരസഭാ പ്രദേശങ്ങളില് സമഗ്ര സ്തനാര്ബുദ ബോധവത്കരണ പ്രവര്ത്തനത്തിലും സ്വയം സ്തനപരിശോധനാ ശീലത്തിലും സ്ത്രീകളില് പരിശീലനം നല്കും. ലാമോഗ്രാഫി പരിശോധന വേണ്ടിവരുന്നവര്ക്ക് ലാമോഗ്രാഫി ക്യാമ്പുകളും സംഘടിപ്പിക്കും. ലോകാരോഗ്യ സംഘടനയുടെ ഗവേഷണ വിഭാഗമായ ഐഎആര്സിയുടെയും എല് ആന്റ് ടി കമ്പനിയുടെയും സഹായവും കണ്ണൂര് ഗൈനക്കോളജിസ്റ്റ് സൊസൈറ്റിയുടെ പങ്കാളിത്തവും ഈ ബൃഹദ് പദ്ധതിക്കുണ്ട്.
പ്രതികരിക്കാൻ ഇവിടെ എഴുതുക: