കുട്ടികളുടെ വലിയ ആശയങ്ങള്, ഭാവിയിലേക്കുള്ള പുതിയ ചുവടുവെയ്പ്പുകള്, ലോകം മാറ്റിമറിച്ചേക്കാവുന്ന കണ്ടുപിടിത്തങ്ങള്….ജന്മഭൂമിയും വിജ്ഞാന ഭാരതിയുടെ സംരംഭമായ സയന്സ് ഇന്ത്യ മാഗസിനും സംയുക്തമായി സംഘടിപ്പിക്കുന്ന സ്റ്റുഡന്സ് സയന്സ് ഫെസ്റ്റിവല് ഓഫ് കേരള(എസ്എസ്എഫ്കെ)യ്ക്ക് കളമശ്ശേരി രാജഗിരി പബ്ലിക് സ്കൂള് ഓഡിറ്റോറിയത്തില് തിരിതെളിഞ്ഞു. പുതിയ ശാസ്ത്രജ്ഞരെ ഇനി നമുക്ക് കണ്ടെത്താം.
കുട്ടികളിലെ ശാസ്ത്ര അവബോധം വളര്ത്തുന്നതിനും അവരുടെ കണ്ടുപിടുത്തങ്ങളെ ലോകത്തിനുമുന്നിലെത്തിക്കുകയുമാണ് ശാസ്ത്രോത്സവം ഒരുക്കിയത്. സംസ്ഥാന സിലബസ്, ഐസിഎസ്ഇ, ഐഎസ്സി, സിബിഎസ്ഇ വിദ്യാര്ത്ഥികളെ ഒരുമിപ്പിച്ചാണ് മേള. കുട്ടകള് ശാത്രമേളയെ ആവേശത്തോടെയാണ് കണ്ടത്. സ്കൂളില് നിന്ന് പഠിച്ച പാഠങ്ങള്ക്ക് പുറമെ വായിച്ചറിഞ്ഞതും കേട്ടറിഞ്ഞതുമായ കാര്യങ്ങള് അവര് കണ്ടുപിടുത്തങ്ങളിലേക്ക് കൊണ്ടുവരാന് ശ്രമിച്ചു. ചിലര് അനുഭവ പാഠങ്ങള് കൂടി ചേര്ത്തതോടെ ശാസ്ത്രോത്സവത്തില് വലിയ ആശയങ്ങളാണുണ്ടായത്.
ഊര്ജ്ജം, കാര്ഷികം, ജലം, ഐടി, പ്രകൃതി സംരക്ഷണം, ആരോഗ്യം എന്നീ വിഭാഗങ്ങളിലായിരുന്നു പ്രദര്ശനം. മലിനജലം ശുദ്ധീകരിച്ച് കുടിവെള്ളം ആക്കുക, ബുള്ളറ്റ് ട്രെയിനിനേക്കാള് വേഗത്തില് ഓടുന്ന ട്രെയിന്, കടല് വെള്ളത്തില്നിന്നുള്ള വൈദ്യുതി ഉല്പ്പാദനം, കുടിവെള്ള ടാങ്കിലെ നിറഞ്ഞൊഴുകല് തടയല്, കീടങ്ങളെ നശിപ്പിക്കുന്നതിനുള്ള രീതികള് എന്നിങ്ങനെയുള്ള വ്യത്യസ്തയിനങ്ങളാണ് കുട്ടികള് ശാസ്ത്രമേളയില് അവതരിപ്പിച്ചത്. എറണാകുളം, ആലപ്പുഴ ജില്ലകളിലെ 42 സ്കൂളുകളില് നിന്നുള്ള വിദ്യാര്ത്ഥികള് പങ്കെടുത്തു.
ഹൈസ്കൂള് തലം മുതല് ബിരുദതലം വരെയുള്ള കുട്ടികള് ശാസ്ത്രോത്സവത്തില് പങ്കെടുത്തു.
വിജയികള്ക്ക് മികച്ച സമ്മാനങ്ങളും പ്രഖ്യാപിച്ചതോടെ, മികച്ച ആശയങ്ങളുമായാണ് ഓരോ സ്കൂളുകളും എത്തിയത്. മേഖലാ തലങ്ങളില് നിന്ന് വിജയികളാകുന്ന ആദ്യ മൂന്ന് സ്ഥാനക്കാരെ തിരുവനന്തുപുരത്ത് നടക്കുന്ന സംസ്ഥാന തല മത്സരത്തില് പങ്കെടുപ്പിക്കും. മേഖലാ തലങ്ങളിലും സംസ്ഥാനതലത്തിലും വിജയിക്കുന്നവര്ക്ക് 25,000, 35,000 രൂപ എന്ന ക്രമത്തിലാണ് സമ്മാനം. പങ്കെടുക്കുന്ന എല്ലാ വിദ്യാര്ത്ഥികള്ക്ക് സര്ട്ടിഫിക്കറ്റും നല്കും.
കേന്ദ്ര പിഎഫ് കമ്മീഷണര് ഡോ.വി.പി. ജോയി ഉദ്ഘാടനം ചെയ്തു. സെന്ട്രല് ഇന്സ്റ്റിയൂട്ട് ഓഫ് ഫിഷറീസ് ടെക്നോളജിയുടെ ചീഫ് ടെക്നിക്കല് ഓഫീസര് ഡോ. എ.ആര്.എസ്. മേനോന് അദ്ധ്യക്ഷനായി. സിഎംഐ പ്രൊവിന്ഷ്യല് ഹൗസ് മാനേജര് ഫാ.ഡോ. ജോസ് കുറിയേടത്ത്, രാജഗിരി പബ്ലിക് സ്കൂള് പ്രിന്സിപ്പാള് ഫാ. വര്ഗ്ഗീസ് കാച്ചപ്പള്ളി, വിജ്ഞാനഭാരതി ദക്ഷിണ മേഖല സെക്രട്ടറി വിവേകാനന്ദ പൈ, ഫാ. ഓസ്റ്റിസ്, എസ്എസ്എഫ്കെ ജനറല് കണ്വീനര് വിപിന് കൂടിയേടത്ത്, ജന്മഭൂമി ജനറല് മാനേജര് കെ.ബി. ശ്രീകുമാര്, യൂണിറ്റ് മാനേജര് നവീന് കേശവ്, ഡെവലപ്മെന്റ് മാനേജര് രാജീവ് നാരായണന് തുടങ്ങിയവര് പങ്കെടുത്തു.
പ്രതികരിക്കാൻ ഇവിടെ എഴുതുക: