രാജ്കോട്ട്: ഓപ്പണര് കോളിന് മണ്റോയുടെ അടിപൊളി സെഞ്ചുറിയില് ന്യൂസിലന്ഡിന് കൂറ്റന് സ്കോര്. ഇന്ത്യക്കെതിരായ രണ്ടാം ട്വന്റി 20 മത്സരത്തില് അവര് രണ്ടു വിക്കറ്റിന് 196 റണ്സ് എടുത്തു.
അന്പത്തിയെട്ട് പന്തില് ഏഴ് ഫോറും അത്രയും തന്നെ സിക്സറും പൊക്കിയ മണ്റോ 109 റണ്സുമായി അജയ്യനായി നിന്നു. മണ്റോയുടെ രണ്ടാം സെഞ്ചുറിയാണിത്.
ഓപ്പണര് ഗുപ്ടിലുമൊത്ത് മണ്റോ ടീമിന് ഉശിരന് തുടക്കം സമ്മാനിച്ചു. ആദ്യ വിക്കറ്റില് 105 റണ്സാണിവര് അടിച്ചെടുത്തത്. 41 പന്തില് മൂന്ന് ഫോറും മൂന്ന് സിക്സറും അടിച്ച് ഗുപ്ടില് 45 റണ്സുമായി കളം വിട്ടു. ചഹലിന്റെ പന്തില് പാണ്ഡ്യ ക്യാച്ചെടുത്താണ് ഗുപ്ടിലിനെ മടക്കിയത്.
തുടര്ന്നെത്തിയ നായകന് വില്ല്യംസണ് വീണ്ടും പരാജയപ്പെട്ടു. പുതുമുഖമായ മുഹമ്മദ് സിറാജിന്റെ പന്തില് കിവീസ് ക്യാപ്റ്റന് വീണു. 12 റണ്സാണ് സമ്പാദ്യം. നേരിട്ട ഒമ്പതു പന്തില് രണ്ടെണ്ണം അതിര്ത്തികടത്തി.വില്ല്യംസണ് മടങ്ങുമ്പോള് സ്കോര് രണ്ടു വിക്കറ്റിന് 140 റണ്സ്.
നാലാമനായി ഇറങ്ങിയ ബ്രൂസ് മണ്റോയ്ക്ക് മികച്ച പിന്തുണ നല്കി. അഭേദ്യമായ മൂന്നാം വിക്കറ്റില് ഇവര് 56 റണ്സ് കൂട്ടിചേര്ത്തു. 12 പന്തില് രണ്ട് ഫോറുള്പ്പെടെ 18 റണ്സുമായി ബ്രൂസ് പുറത്താകാതെ നിന്നു.അരങ്ങേറ്റക്കാരനായ പേസര് മുഹമ്മദ് സിറാജ് 53 റണ്സിന് ഒരുവിക്കറ്റ് വീഴ്ത്തി. സ്പിന്നര് ചഹാല് 36 റണ്സിന് ഒരുവിക്കറ്റെടുത്തു.
ടോസ് നേടിയ ന്യൂസിലന്ഡ് ബാറ്റിങ്ങ് തെരഞ്ഞെടുക്കുകയായിരുന്നു.
സ്കോര്ബോര്ഡ്
ന്യൂസിലന്ഡ്: ഗുപ്ടില് സി പാണ്ഡ്യ ബി ചഹല് 45, മണ്റോ നോട്ടൗട്ട് 109, വില്ല്യംസണ് സി ശര്മ ബി മുഹമ്മദ് സിറാജ് 12, ബ്രൂസ് നോട്ടൗട്ട് 18, എക്സ്ട്രാസ് 12, ആകെ 20 ഓവറില് രണ്ട് വിക്കറ്റിന് 196.
വിക്കറ്റ് വീഴ്ച: 1-105, 2-140
ബൗളിങ്ങ്: ബി കുമാര് 4-0-29-0, മുഹമ്മദ് സിറാജ് 4-0-53-1, ബുംറ 4-0-23-0, ചഹല് 4-0-36-1, എ.ആര്. പട്ടേല് 3-0-39-0, ഹാര്ദിക് പാണ്ഡ്യ 1-0-14-0.
പ്രതികരിക്കാൻ ഇവിടെ എഴുതുക: