കാട്ടാക്കട: കാലുകളില്ലാതെ കൊടുംകാട്ടില് ഇഴഞ്ഞു ജീവിക്കുന്ന കോട്ടൂര് ആദിവാസി ഊരിലെ സദാശിവന് കാണി(65)യുടെ രോദനം ജന്മഭൂമിയിലൂടെ അറിഞ്ഞ് സഹായഹസ്തം നീട്ടി സേവാഭാരതിയെത്തി. മുപ്പതുവര്ഷമായി പുറംലോകം കാണാതെ കാട്ടിനുളളില് കഴിയുന്ന ഈ വനവാസിക്ക് വീല്ചെയറും ഭക്ഷ്യവസ്തുക്കളും സേവാഭാരതി പ്രവര്ത്തകര് എത്തിച്ചു.
ഇരുകാലുകളും മുറിച്ചുമാറ്റപ്പെട്ട സദാശിവന് കണിക്ക് ജീവിതം മടുത്തിട്ട് കാലങ്ങളായി. ഒരുനേരം പോലും ഒരല്പം ഭക്ഷണം കിട്ടാതെ നരകിക്കുന്ന തനിക്ക് ദയവധം അനുവദിക്കണമെന്നതായിരുന്നു ഈ ആദിവാസി വൃദ്ധന്റെ ആവശ്യം. ജന്മഭൂമി വാര്ത്ത ശ്രദ്ധയില്പെട്ടതോടെ സേവാഭാരതി പ്രവര്ത്തകര് വൈകല്യം തളര്ത്തിയ സദാശിവന്റെ ഊരിലേക്ക് ഭക്ഷ്യധാന്യങ്ങളും വസ്ത്രങ്ങളുമായി എത്തുകയായിരുന്നു.
1986 ല് ഇടതുകാലിനുണ്ടായ ചെറിയൊരു നീര്വീക്കമാണ് സദാശിവന് കാണിയുടെ ജീവിതം തകര്ത്തത്. വൈദ്യശാസ്ത്രം പേരു കണ്ടെത്താത്ത ആ രോഗം ദിവസങ്ങള്ക്കുള്ളില് മൂര്ച്ഛിച്ച് ഒടുവില് കാല് മുട്ടിനു മുകളില് വച്ച് മുറിച്ചുമാറ്റേണ്ടി വന്നു. ഒരുവര്ഷത്തിനു ശേഷം ഇതേ അസുഖത്തെ തുടര്ന്ന് വലതുകാലും മുറിച്ചു മാറ്റപ്പെട്ടതോടെ സദാശിവന് കാണി കാടിന്റെ സങ്കടക്കാഴ്ചയായി. പത്താം ക്ലാസുവരെ പഠിച്ചിട്ടുള്ള സദാശിവന് കാണിക്ക് വനം വകുപ്പില് വാച്ചര് ജോലി ഏതാണ്ട് ശരിയായപ്പോഴാണ് കാലുകള് നഷ്ടമായത്. അതോടെ ആ പ്രതീക്ഷയും മങ്ങി. കലുകളില്ലാതെ ഇഴയുന്ന സദാശിവനെ ഒറ്റയ്ക്കാക്കി പോകാനാകാത്തതിനാല് ഭാര്യ ഉഷയ്ക്ക് കൂലിപ്പണിക്ക് പോകാനും കഴിയില്ല. ഏക മകന് രഞ്ജിത്ത് പ്ലസ്ടു വരെ പഠിച്ചിട്ടുണ്ട്. പ്രാഥമികകൃത്യങ്ങള്ക്കു പോലും പുറത്തേക്ക് പോകണമെങ്കില് രഞ്ജിത്ത് ഒക്കത്തെടുത്താണ് സദാശിവന് കാണിയെ കൊണ്ടുപോകുന്നത്.
കോട്ടൂര് പാങ്കാവിലെ പ്രധാനറോഡില് നിന്ന് മൂന്നുകിലോമീറ്റര് ഇടുങ്ങിയ മണ്റോഡിലൂടെ യാത്രചെയ്തശേഷം ഒരു കിലോമീറ്റര് കാട്ടുപാതയിലൂടെ കല്നടയായി സഞ്ചരിച്ചാലേ സദാശിവന് കാണിയുടെ കുടിലിലെത്താന് സാധിക്കൂ. നാലുദിക്കും കുന്നുകളാല് മൂടപ്പെട്ട ഊര്. കാട്ടാനയും കാട്ടുപന്നിയുമടക്കം വന്യമൃഗശല്യം രൂക്ഷമാണിവിടെ. പുഴുവിനെ പോലെ ഇഴഞ്ഞു നീങ്ങുന്ന സദാശിവന് കാണിക്കും കുടുംബത്തിനും ഒരു വീട് കാടിനുള്ളിലുണ്ട്. ഇത് തകര്ന്ന നിലയിലാണ്. ഈ വീട് അറ്റകുറ്റപ്പണി തീര്ത്ത് വാസയോഗ്യമാക്കി നല്കാമെന്ന് സേവാഭാരതി പ്രവര്ത്തകര് ഉറപ്പുനല്കി. കോന്നി സേവാകേന്ദ്രം ഡയറക്ടര് കോന്നി സി.എസ്. മോഹന്, സേവാഭാരതി ജില്ലാ സമിതിയംഗം വിനുകുമാര്, ആര്എസ്എസ് സേവാപ്രമുഖ് കുറ്റിച്ചല് സുധന്, ശിവജിപുരം ഭുവനചന്ദ്രന് എന്നിവരുടെ നേതൃത്വത്തിലായിരുന്നു സദാശിവന് കാണിയെ സന്ദര്ശിക്കാന് സേവാഭാരതി പ്രവര്ത്തകര് എത്തിയത്.
പ്രതികരിക്കാൻ ഇവിടെ എഴുതുക: