കണ്ണൂര്: സംസ്ഥാന സ്കൂള് ഗെയിംസ് ഗ്രൂപ്പ്-2 ചാമ്പ്യന്ഷിപ്പ് മത്സരങ്ങള് ആരംഭിച്ചു. മുണ്ടയാട് ഇന്ഡോര് സ്റ്റേഡിയം, ഗവ: വൊക്കേഷണല് എച്ച്എസ്എസ്, ജവഹര് സ്റ്റേഡിയം എന്നിവിടങ്ങളിലാണ് മത്സരം നടക്കുന്നത്. വിവിധ മത്സരങ്ങളിലായി രണ്ടായിരത്തോളം കായികതാരങ്ങള് മാറ്റുരയ്ക്കും. ജൂഡോ, ടേബിള്ടെന്നീസ്, ഹോക്കി, ബാസ്കറ്റ്ബോള്, ഖൊ-ഖൊ എന്നീ മത്സരങ്ങളാണ് നടക്കുന്നത്. മത്സരത്തില് ഒന്നാംസ്ഥാനം നേടുന്നവര് ദേശീയഗെയിംസില് പങ്കെടുക്കാന് സാധിക്കും.
മൂന്നാമത് ഗ്രൂപ്പ് മത്സരങ്ങള് കൊല്ലത്ത് 24 മുതല് 26 വരെ നടക്കും. ക്രിക്കറ്റ്, വോളിബോള്, ലോണ്ടെന്നീസ്, ബാഡ്മിന്റണ്, ചെസ് എന്നീ മത്സരങ്ങളാണ് നടക്കുക.
സംസ്ഥാന സ്കൂള് ഗെയിംസ് ഗ്രൂപ്പ് രണ്ട് ചാമ്പ്യന്ഷിപ്പ് മുണ്ടയാട് ഇന്ഡോര് സ്റ്റേഡിയത്തില് ജില്ലാ പഞ്ചായത്ത് പ്രസിഡന്റ് കെ.വി.സുമേഷ് ഉദ്ഘാടനം ചെയ്തു. മേയര് ഇ.പി.ലത അധ്യക്ഷയായി. ജില്ലാ പഞ്ചായത്ത് വിദ്യാഭ്യാസ-ആരോഗ്യ സ്റ്റാന്റിംഗ് കമ്മിറ്റി ചെയര്മാന് കെ.പി.ജയബാലന്, ജോയന്റ് ഡയറക്ടര് ഡോ.ചാക്കോ ജോസഫ്, ഡി.ഇ.ഒ കെ.വി.ലീല, ഗെയിംസ് അസോസിയേഷന് സെക്രട്ടറി ഡി.ജിനില് കുമാര്, കോര്ഡിനേറ്റര് പി.പി.മുഹമ്മദലി എന്നിവര് പ്രസംഗിച്ചു.
ബാസ്ക്കറ്റ് ബോള് മത്സരത്തില് കോട്ടയം വിജയികളായി.അണ്ടര് 17 ബോയ്സ് ഹോക്കിയില് എറണാകുളം ടീം വിജയിച്ചു. ഹോക്കി അണ്ടര് 17 ഗേള്സ് മത്സരത്തില് തിരുവന്തപുരം ടീം വിജയിച്ചു. ഖൊ ഖൊ മത്സരത്തില് പാലക്കാട് ബോയ്സും ഗേള്സ് ടീമും വിജയികളായി.
ഇന്ന് പത്തൊമ്പത് വയസിന് താഴെയുള്ള കുട്ടികളുടെ വിഭാഗത്തിലാണ് മത്സരം നടക്കുക. ചാമ്പ്യന്ഷിപ്പ് നാളെ സമാപിക്കും.
പ്രതികരിക്കാൻ ഇവിടെ എഴുതുക: