കൊല്ക്കത്ത: ഓപ്പണര്മാരായ ശിഖര് ധവാന്റെയും കെ.എല് രാഹുലിന്റെയും അര്ധ സെഞ്ചുറികളില് ഇന്ത്യ തിരിച്ചുവരുന്നു. ശ്രീലങ്കക്കെതിരായ ഒന്നാം ക്രിക്കറ്റ് ടെസ്റ്റിന്റെ നാലാം ദിനത്തില് ഇന്ത്യ ഒരു വിക്കറ്റ് നഷ്ടത്തില് 171 റണ്സിലെത്തി നില്ക്കുകയാണ്.ഒരു ദിവസത്തെ കളി മാത്രം ശേഷിക്കെ ടെസ്റ്റ് സമനിലയാകുമെന്ന് എതാണ്ടുറപ്പായി.
രാഹുല് 73 റണ്സുമായി പുറത്താകാതെ നില്ക്കുകയാണ്. തകര്ത്തടിച്ച ധവാന് സെഞ്ചുറിക്ക് ആറു റണ്സ് അകലെവച്ച് പുറത്തായി. 116 പന്ത് നേരിട്ട ധവാന് പതിനൊന്ന് ഫോറും ഒരു സിക്സറുമുള്പ്പെടെയാണ് 94 റണ്സ് കുറിച്ചത്. ഒന്നാം വിക്കറ്റില് രാഹുലും ധവാനും 166 റണ്സിന്റെ കൂട്ടുകെട്ടുണ്ടാക്കി. ധവാന് പുറത്തായശേഷമെത്തിയ പൂജാര രണ്ടു റണ്സുമായി ക്രീസിലുണ്ട്. ആദ്യ ഇന്നിങ്ങ്സില് പൂജാര അര്ധ സെഞ്ചുറി നേടിയിരുന്നു.
ആദ്യ ഇന്നിങ്ങ്സില് 122 റണ്സ് ലീഡ് വഴങ്ങിയ ഇന്ത്യ ഇപ്പോള് 49 റണ്സിന് മുന്നിലാണ്. രണ്ടാം ഇന്നിങ്ങ്സിലെ ഒമ്പതു വിക്കറ്റും കൈവശമുണ്ട്. അത്ഭുതങ്ങള് സംഭവിച്ചില്ലെങ്കില്, ഇന്നത്തെ കളിമാത്രം ശേഷിക്കെ ടെസ്റ്റ് സമനിലയാകും.
നേരത്തെ നാലിന് 165 റണ്സിന് ഒന്നാം ഇന്നിങ്ങ്സ് തുടങ്ങിയ ശ്രീലങ്ക 294 റണ്സിന് ഓള്ഔട്ടായി. പേസര് മുഹമ്മദ് ഷമിയാണ് ശ്രീലങ്കന് വാലറ്റനിരയെ ത കര്ത്തത്. ഷമി 100 റണ്സിന് നാലു വിക്കറ്റുകള് വീഴ്ത്തി. ഭുവനേശ്വര് കുമാര് 88 റണ്സിന് നാലു വിക്കറ്റുകളെടുത്തു.
ഒമ്പതാമനായി ബാറ്റിങ്ങിനിറങ്ങിയ ശ്രീലങ്കയുടെ രംഗന ഹെറാത്ത് 67 റണ്സ് അടിച്ചെടുത്തു. 105 പന്ത് നേരിട്ട ഹെറാത്ത് ഒമ്പതെണ്ണം അതിര്ത്തി കടത്തിവിട്ടു.
സ്കോര് ബോര്ഡ്: ഇന്ത്യ: ഒന്നാം ഇന്നിങ്ങ്സ്: 172, ശ്രീലങ്ക: ഒന്നാം ഇന്നിങ്ങ്സ് : 294.
ഇന്ത്യ: രണ്ടാം ഇന്നിങ്ങ്സ്: കെ.എല് രാഹുല് നോട്ടൗട്ട് 73, ശിഖര് ധവാന് സി ഡിക്ക്വെല്ല ബി ശനക 94. എക്സ്ട്രാസ് 2 ആകെ ഒരു വിക്കറ്റിന് 171.
വിക്കറ്റ് വീഴ്ച: 1-166
ബൗളിങ്ങ്: ലക്മല് 8-0-29-0, ഗാമേജ് 9-0-47-0, ശനക 9.3-1-29-1, പെരേര 10-1-41-0, ഹെറാത്ത് 3-0-25-0.
പ്രതികരിക്കാൻ ഇവിടെ എഴുതുക: