ആലപ്പുഴ: സിപിഎമ്മിനെ മുന് തെരഞ്ഞെടുപ്പുകളില് സഹായിച്ചതു പോലെ ഇനിയും സഹായിക്കുമെന്ന് എസ്ഡിപിഐ സംസ്ഥാന ജനറല് സെക്രട്ടറി അജ്മല് ഇസ്മായില് വ്യക്തമാക്കി. ബിജെപിക്കെതിരെ സിപിഎമ്മുമായി സഹകരിച്ച പോരാട്ടമാണ് എസ്ഡിപിഐ നടത്തുന്നത്. ഇതിനിടെ സിപിഎമ്മുമായി ഉണ്ടാകുന്ന സംഘര്ഷം പ്രാദേശിക പ്രശ്നങ്ങള് മാത്രമാണെന്നും അദ്ദേഹം പറഞ്ഞു.
ഇപ്പോഴുണ്ടായ സംഘര്ഷങ്ങള് സിപിഎമ്മുമായുള്ള സഹകരണത്തിന് തടസ്സമാകില്ല. കഴിഞ്ഞ നിയമസഭാ തെരഞ്ഞെടുപ്പില് ബിജെപി ജയിക്കാന് സാദ്ധ്യതയുണ്ടായിരുന്ന എട്ടു നിയോജക മണ്ഡലങ്ങളില് എസ്ഡിപിഐ ജയസാദ്ധ്യത പരിശോധിച്ച് ഇരു മുന്നണികളെയും സഹായിച്ചു. അതിനാലാണ് ബിജെപിയുടെ ജയം ഒരു സീറ്റില് ഒതുങ്ങിയത്. ഇവിടങ്ങളില് പാര്ട്ടി സ്ഥാനാര്ത്ഥികള് മത്സരിക്കാതെയാണ് ഇടതുവലതു മുന്നണികള്ക്ക് വോട്ട് നല്കിയത്.
മഞ്ചേശ്വരത്ത് ബിജെപി സ്ഥാനാര്ത്ഥി നിസ്സാര വോട്ടുകള്ക്ക് പരാജയപ്പെട്ടതും എസ്ഡിപിഐയുടെ ഈ നിലപാട് കാരണമാണ്. അവിടെ രണ്ടായിരത്തോളം വോട്ടുകള് യുഡിഎഫിന് നല്കിയാണ് ബിജെപിയെ പരാജയപ്പെടുത്തിയത്. വരുന്ന തെരഞ്ഞെടുപ്പുകളിലും ഇതെ സമീപനമായിരിക്കും പാര്ട്ടിയുടേതെന്ന് അജ്മല് പത്രസമ്മേളനത്തില് പറഞ്ഞു.
പ്രതികരിക്കാൻ ഇവിടെ എഴുതുക: