കണ്ണൂര്: ദേശീയ ക്ഷീരദിനത്തോടനുബന്ധിച്ച് 26, 27 തിയ്യതികളില് മില്മ ഉല്പന്നങ്ങള് ഡിസ്കൗണ്ട് നിരക്കില് പൊതുജനങ്ങള്ക്ക് ലഭിക്കും. ഇന്ത്യയുടെ പാല്ക്കാരന് എന്നറിയപ്പെടുന്ന ഡോ.വര്ഗ്ഗീസ് കുര്യന്റെ ജന്മദിനമായ നവംബര് 26 ദേശീയ ക്ഷീരദിനമായി ആചരിച്ചുവരികയാണ്. ഇതിന്റെ ഭാഗമായി കേരളത്തിലുടനീളം മില്മയുടെ ആഭിമുഖ്യത്തില് സെമിനാറുകളും ഡയറി സന്ദര്ശന പരിപാടികളും സംഘടിപ്പിക്കുന്നുണ്ട്. ഇതോടനുബന്ധിച്ച് 26, 27 തിയ്യതികളില് കണ്ണൂര് പൊടിക്കുണ്ടില് പ്രവര്ത്തിക്കുന്ന മില്മ ഡയറി സന്ദര്ശിക്കുന്നതിന് പൊതുജനങ്ങള്ക്ക് പ്രത്യേക സൗകര്യം ഏര്പ്പെടുത്തും.
പ്രത്യേകം തയ്യാറാക്കിയ സ്പെഷല് സ്റ്റാളുകള് വഴി മില്മ ഉല്പന്നങ്ങള് പൊതുജനങ്ങള്ക്ക് ലഭ്യമാക്കും. ഇതുകൂടാതെ, കണ്ണൂര് കലക്ട്രേറ്റ് കോംപൗണ്ടില് പ്രവര്ത്തിക്കുന്ന കുടുംബശ്രീ സ്റ്റാളിന് സമീപവും സ്പെഷല് സ്റ്റാള് പ്രവര്ത്തിക്കുമെന്ന് ഡയറി മാനേജര് അറിയിച്ചു.
പ്രതികരിക്കാൻ ഇവിടെ എഴുതുക: