പയ്യാവൂര്: മീസില്സ് റൂബെല്ല വാക്സിനേഷനെതിരെ വ്യാപകമായി വ്യാജ പ്രചരണങ്ങള് നടക്കുമ്പോള് പയ്യാവൂര് ഹയാത്തുല് ഇസ്ലാം മദ്രസയില് വെച്ച് വാക്സിനേഷന് ക്യാമ്പ് നടത്തി മദ്രസ ഭാരവാഹികള് മാതൃകയായി. പയ്യാവൂര് പഞ്ചായത്തിനെ ബാലസൗഹൃദ പഞ്ചായത്താക്കി മാറ്റുന്നതിന്റെ ഭാഗമായി പഞ്ചായത്തിലെ മുഴുവന് കുട്ടികള്ക്കും വാക്സിനേഷന് ഉറപ്പ് വരുത്തുക എന്ന ലക്ഷ്യവുമായി നടത്തുന്ന ക്യാമ്പയിന്റെ ഭാഗമായാണ് മദ്രസയില് വെച്ച് വാക്സിനേഷന് ക്യാമ്പ് എന്ന ആശയം പഞ്ചായത്ത് മുന്നോട്ട് വച്ചതെന്നും മദ്രസ ഭാരവാഹികളും പള്ളി ഖത്തീബും ഇതിനോട് പൂര്ണ്ണമായി സഹകരിക്കുകയായിരുന്നെന്നും ഇത് മാതൃകാപരമായ നിലപാടാണെന്നും പഞ്ചായത്ത് പ്രസിഡണ്ട് ഡെയ്സി ചിറ്റൂപ്പമ്പില് മീസില്സ് റൂബെല്ല വാക്സിനേഷന് ക്യാമ്പ് ഉദ്ഘാടനം ചെയ്തുകൊണ്ട് പറഞ്ഞു. വൈസ് പ്രസിഡന്റ് ടി.പി.അഷ്റഫ് അദ്ധ്യക്ഷത വഹിച്ചു. ഖത്തീബ് സുബൈര് ദാരിമി, മഹല്ല് പ്രസിഡന്റ് യു.പി.അബുബക്കര്, ചന്ദനക്കാംപാറ പ്രാഥമികാരോഗ്യകേന്ദ്രത്തിലെ ഡോ.ബിജോയി ആന്റണി, ഹെല്ത്ത് ഇന്സ്പെക്ടര് ബെറ്റ്സി, നഴ്സ് കെ.ആര്.പുഷ്പവല്ലി, ജെ.എച്ച്ഐ ശ്രീനിവാസ് എന്നിവര് പ്രസംഗിച്ചു. ക്യാമ്പില് വന്നവരെ മദ്രസ അധികൃതരും ചന്ദനക്കാംപാറ പിഎച്ച്സി ജീവനക്കാരും മധുരം നല്കിയാണ് സ്വീകരിച്ചത്.
പ്രതികരിക്കാൻ ഇവിടെ എഴുതുക: