അരോളി: വടേശ്വരം മഹാശിവക്ഷേത്രത്തില് ശ്രീമദ് ഭാഗവത സപ്താഹ ജ്ഞാനയജ്ഞത്തിന് നാളെ തുടക്കമാകും. സംബോധ് ഫൗണ്ടേഷന്റെ കേരളത്തിലെ മുഖ്യാചാര്യനായ അധ്യാത്മാനന്ദ സരസ്വതി നേതൃത്വം നല്കുന്ന ജ്ഞാനയജ്ഞം 17 വരെ നീണ്ടുനില്ക്കും.
10ന് വൈകുന്നേരം 4ന് യജ്ഞാചാര്യനടക്കമുള്ള സന്ന്യാസിവര്യന്മാരെ കീച്ചേരിക്കുന്നില്നിന്നും ക്ഷേത്രത്തിലേക്ക് സ്വീകരിച്ച് ആനയിക്കും. 5 മണിക്ക് കണ്ണൂര് മാതാ അമൃതാനന്ദമയിമഠത്തിലെ സ്വാമി അമൃതകൃപാനന്ദപുരി ജ്ഞാനയജ്ഞം ഉദ്ഘാടനം ചെയ്യും. പാലക്കാട് ദയാനന്ദാശ്രമം മഠാധിപതി സ്വാമി കൃഷ്ണാത്മാനന്ദ സരസ്വതി, ക്ഷേത്രം തന്ത്രി കാട്ടുമാടം ഇളയിടത്ത് ഈശാനന് നമ്പൂതിരിപ്പാട് എന്നിവര് അനുഗ്രഹഭാഷണം നടത്തും. ദീപാരാധനയ്ക്കുശേഷം സ്വാമി അധ്യാത്മാനന്ദ സരസ്വതി മാഹാത്മ്യ പ്രഭാഷണം നടത്തും. 11 മുതല് ദിവസവും രാവിലെ ഗണപതി ഹോമവും വിഷ്ണുസഹസ്രനാമ ജപവും തുടര്ന്ന് ഭാഗവത പാരായണവും പ്രഭാഷണവും അന്നദാനവും ഉണ്ടായിരിക്കും.
യജ്ഞദിവസങ്ങളില് ദീപാരാധനയ്ക്കുശേഷം പ്രത്യേക പരിപാടികളും ഒരുക്കിയിട്ടുണ്ട്. 11ന് സംഗീതാരാധന, 12ന് സര്വൈശ്വര്യപൂജ, 13ന് വിദ്യാഗോപാലമന്ത്രാര്ച്ചന, 14നും 15നും സംഗീതാരാധന, 16ന് മാതൃപൂജ എന്നിവയുണ്ടാകും. 17ന് ഉച്ചയോടെ നടക്കുന്ന അവഭൃഥസ്നാനം, യജ്ഞസമര്പ്പണം എന്നീ പരിപാടികളോടെ ജ്ഞാനയജ്ഞത്തിന് സമാപനമാകും.
പ്രതികരിക്കാൻ ഇവിടെ എഴുതുക: