അന്തിക്കാട്: പുത്തന്പീടിക മഞ്ഞപ്പിത്തം സെന്ററിന് സമീപം സാമൂഹ്യ വിരുദ്ധര് വീടാക്രമിച്ചു. തട്ടാടി സുബ്രഹ്മണ്യ ക്ഷേത്രത്തിന് മുന്നില് താമസിക്കുന്ന വാലത്ത് ഉണ്ണികൃഷ്ണന്റെ വീടിന് നേരെയായിരുന്നു ആക്രമണം. വീടിന്റെ മുന്വശത്തെ രണ്ട് ജനലിന്റെയും ഇടതുവശത്തെ ഒരു ജനലിന്റെയും ചില്ലുകളും മുറ്റത്ത് പാര്ക്ക് ചെയ്തിരുന്ന വാഹനത്തിന്റെ മുന്നിലെയും ഇടതുവശത്തെയും ചില്ലുകളും പൂര്ണ്ണമായും തകര്ത്ത നിലയിലാണ്.
ശനിയാഴ്ച പുലര്ച്ചെ രണ്ടരയോടെയായിരുന്നു ആക്രമണം. ശബ്ദം കേട്ട് വീട്ടുകാര് ഉണര്ന്ന് ലൈറ്റിട്ടപ്പോള് അക്രമിസംഘം ഓടി മറയുന്നത് കണ്ടതായി വീട്ടുടമ പറഞ്ഞു. ഒരേ സമയത്താണ് എല്ലാം തല്ലിത്തകര്ത്തത്. സംഭവമറിഞ്ഞ് അന്തിക്കാട് പോലീസും ഗ്രാമ പഞ്ചായത്ത് പ്രസിഡന്റ് എ.വി.ശ്രീവത്സനും സ്ഥലത്തെത്തി. ഉണ്ണികൃഷ്ണന്റെ പരാതിയില് പോലീസ് കേസ്സെടുത്തു.
പ്രതികരിക്കാൻ ഇവിടെ എഴുതുക: