ഒഡിഷ: പഠിച്ചാല് മാത്രം പോരാ, പഠിക്കണമെങ്കില് അധ്യാപകനെ മസാജും ചെയ്യണം. പാത്രവും കഴുകണമെന്നതാണ് വിദ്യാര്ത്ഥികളുടെ അവസ്ഥയെങ്കിലോ? ഒഡിഷ കലമഗാഡിയ യുജിഎംഇ സ്കൂളിലെ അധ്യാപകനാണ് വിദ്യാര്ഥികളെക്കൊണ്ട് മസാജ് ചെയ്യിപ്പിക്കുന്നത്. കൂടാതെ ഹോസ്റ്റലിലെ പാത്രം കഴുകിക്കുന്നതും അടുക്കള വൃത്തിയാക്കുന്നതുമെല്ലാം കുട്ടികള് തന്നെ.
ഇതു പകര്ത്തിയ വീഡിയോ സോഷ്യല് മീഡിയയില് വ്യാപകമായി പ്രചരിക്കുന്നു. അദ്ധ്യാപകനായ രബീന്ദ്രകുമാര് ബെഹ്റയാണ് കുറ്റക്കാരനെന്ന് വ്യക്തമായിട്ടുണ്ട്. സ്കൂള് ഹോസ്റ്റലിന്റെ സൂപ്രണ്ടും കൂടിയാണ് രബീന്ദ്രകുമാര്. സംഭവത്തില് പ്രതിഷേധിച്ച് കുട്ടികളുടെ രക്ഷിതാക്കളും ബന്ധുക്കളും രംഗത്തെത്തി.
കഴിഞ്ഞ ഞായറാഴ്ച നടന്ന സംഭവമാണ് പുറത്തായിരിക്കുന്നത്. സ്കൂള് സമയം തുടങ്ങുന്നതിനു മുമ്പും ഹോസ്റ്റലില് എത്തിക്കഴിഞ്ഞുമാണ് ഇയാള് വിദ്യാര്ത്ഥികളെ വിറക് ശേഖരിക്കാന് വിടുന്നതും പാത്രം കഴുകിക്കുന്നതും. പരാതിപ്പെട്ടാല് കടുത്ത ശിക്ഷ. ഇതുപേടിച്ച് കുട്ടികളാരും പരാതിപ്പെടാറില്ല. മുമ്പ് ഹെഡ്മാസ്റ്ററോട് പരാതിപ്പെട്ടുവെങ്കിലും നടപടികളൊന്നുമുണ്ടായില്ല.
ജില്ലാ ക്ഷേമവകുപ്പിനു കീഴിലാണ് ഹോസ്റ്റല്. ഇതുസംബന്ധിച്ച് നടപടിയെടുക്കേണ്ടത് കളക്ടറാണെന്നും അദ്ദേഹത്തോട് നടപടിയെടുക്കണമെന്ന് ആവശ്യപ്പെട്ടിട്ടുണ്ടെന്നും ജില്ലാ ക്ഷേമ വകുപ്പ് ഉദ്യോഗസ്ഥന് കൃപാസിന്ധു ബെഹ്റ വ്യക്തമാക്കി.
പ്രതികരിക്കാൻ ഇവിടെ എഴുതുക: