കണ്ണൂര്: അധ്യാപക സംഘടനയായ കേരള പ്രദേശ് സ്കൂള് ടീച്ചേഴ്സ് അസോസിയേഷന് സംസ്ഥാന സമ്മേളനം ഫെബ്രുവരി ഏഴു മുതല് 10 വരെ കണ്ണൂരില് നടക്കും. സമ്മേളനത്തിനു മുന്നോടിയായി സംഘടനയുടെ സാംസ്കാരിക വിഭാഗത്തിന്റെ നേതൃത്വത്തില് വിവിധ പരിപാടികള് സംഘടിപ്പിക്കും. അധ്യാപകര് നാം പ്രകൃതിയുടെ കാവലാള് എന്ന മുദ്രാവാക്യമുയര്ത്തി 23ന് പുഴയൊഴുകും വഴിയേ എന്ന പേരില് പുഴയാത്ര നടത്തും. പുഴകളെ മാലിന്യവിമുക്തമാക്കുന്നതിന്റെ സന്ദേശമുയര്ത്തി നടത്തുന്ന യാത്രയില് 40 അധ്യാപകര് പങ്കെടുക്കും. രാവിലെ 9.30ന് വളപട്ടണം ബോട്ടുജെട്ടിയില് നിന്നാരംഭിക്കുന്ന യാത്ര പാപ്പിനിശേരി, അഴീക്കല്, മാട്ടൂല്, പഴയങ്ങാടി, തെക്കുമ്പാട് എന്നിവിടങ്ങളിലൂടെ സഞ്ചരിച്ച് ഉച്ചകഴിഞ്ഞ് രണ്ടോടെ അഴീക്കല് ബോട്ടുജെട്ടിയില് സമാപിക്കും. പ്രമുഖ പരിസ്ഥിതി പ്രവര്ത്തകന് ടി.പി.പദ്മനാഭന് ക്ലാസെടുക്കും. യാത്രാവേളയില് പുഴ സംരക്ഷണത്തിനായി വിവിധയിടങ്ങളില് കണ്ടലുകള് നടും. സമ്മേളനത്തിന്റെ ഭാഗമായി അധ്യാപകര്ക്കായി കലാകായിക മത്സരങ്ങള് സംഘടിപ്പിക്കും. 27ന് മുനിസിപ്പല് സ്കൂളിലാണ് മത്സരം.
സാംസ്കാരിക വിദ്യാഭ്യാസ രംഗങ്ങളിലെ ഫാസിസത്തിന്റെ കടന്നുകയറ്റത്തിനെതിരെ ചിത്രപ്രതിഷേധം സംഘടിപ്പിക്കും. ജനുവരി രണ്ടിന് ഉച്ചകഴിഞ്ഞ് 3.30ന് കണ്ണൂര് നഗരത്തില് നടക്കുന്ന പരിപാടിയില് സംസ്ഥാനത്തിന്റെ വിവിധ ഭാഗങ്ങളില് നിന്നുള്ള ചിത്രകാരന്മാര് പങ്കെടുക്കും. സമ്മേളനത്തിന്റെ ആദ്യദിവസമായ ഫെബ്രുവരി ഏഴിന് നൂറുകണക്കിന് അധ്യാപികമാര് പങ്കെടുക്കുന്ന മെഗാതിരുവാതിരയും അരങ്ങേറും. പത്രസമ്മേളനത്തില് സംസ്ഥാന വൈസ് പ്രസിഡന്റ് കെ.സി.രാജന്, ജില്ലാ പ്രസിഡന്റ് കെ.രമേശന്, സുരേഷ് ബാബു എളയാവൂര്, രാധാകൃഷ്ണന് മാണിക്കോത്ത്, രാജീവന് എളയാവൂര് എന്നിവര് പങ്കെടുത്തു.
പ്രതികരിക്കാൻ ഇവിടെ എഴുതുക: