വര്ക്കല: ജ്ഞാനത്തിന്റെ കുംഭസ്നാനമാണ് ശിവഗിരി തീര്ഥാടനമെന്ന് പ്രധാനമന്ത്രി നരേന്ദ്ര മോദി. എല്ലാ അറിവുകളും പ്രായോഗിക ജീവിതത്തില് ഉപയോഗിക്കുകയാണെങ്കില് ജനങ്ങളും രാജ്യവും പുരോഗമിക്കുകയും സമൃദ്ധമാവുകയും ചെയ്യുമെന്നതാണ് ശിവഗിരി തീര്ഥാടനത്തിന്റെ മുഖ്യ ലക്ഷ്യമെന്നും അദ്ദേഹം പറഞ്ഞു. എണ്പത്തഞ്ചാമത് ശിവഗിരി തീര്ഥാടനാഘോഷങ്ങളുടെ ഉദ്ഘാടനം വീഡിയോ കോണ്ഫറന്സിങ്ങിലൂടെ നിര്വഹിച്ച് സംസാരിക്കുകകയായിരുന്നു അദ്ദേഹം.
ശ്രീനാരായണഗുരുവിനെപ്പോലുള്ള പുണ്യാത്മാക്കള് ജാതിവാദം, ഉച്ചനീചത്വം, വര്ഗ്ഗീയത തുടങ്ങിയവയ്ക്കെതിരെ സമൂഹത്തെ ഉണര്ത്തി, സമൂഹത്തെ ഒരുമിപ്പിച്ചു. വിദ്യാഭ്യാസ, സാമൂഹിക മേഖലകളിലെ വിജയം വെറുതേയുണ്ടായതല്ല.
ക്ഷേത്രങ്ങളില് സത്യവും ശുചിത്വവും ഉണ്ടാകേണ്ടതിനെക്കുറിച്ച് ഗുരു പറഞ്ഞു. ക്ഷേത്രങ്ങളില് മാലിന്യം നിറച്ചിരുന്ന എല്ലാ പൂജാപദ്ധതികളിലും മാറ്റങ്ങള് കൊണ്ടുവന്നു. ക്ഷേത്രങ്ങളില് പൂജ ചെയ്യാന് എല്ലാവര്ക്കുമുള്ള അവകാശം അദ്ദേഹം ഉറപ്പിച്ചു. ശിവഗിരി തീര്ഥാടനവും സാമൂഹികപരിഷ്കരണത്തെക്കുറിച്ചുള്ള അദ്ദേഹത്തിന്റെ വിശാല വീക്ഷണമാണ്, പ്രധാനമന്ത്രി പറഞ്ഞു.
കേരളത്തിലെ പവിത്ര ഭൂമിയിലാണ് ആദിശങ്കരാചാര്യര് അദ്വൈതസിദ്ധാന്തം അവതരിപ്പിച്ചതെന്ന് പ്രധാനമന്ത്രി ഓര്മിപ്പിച്ചു. ശ്രീനാരായണഗുരു അദ്വൈതസിദ്ധാന്തം ജീവിച്ചു കാട്ടി എന്നു മാത്രമല്ല, എങ്ങനെ ജീവിക്കാവുന്നതാണെന്ന് വിശ്വസമൂഹത്തിനൊന്നാകെ കാട്ടിക്കൊടുക്കുകയും ചെയ്തു.
1947 ആഗസ്റ്റ് 15 ന് അടിമച്ചങ്ങല പൊട്ടിച്ചെറിെഞ്ഞങ്കിലും ആ ചങ്ങലയുടെ പാടുകള് നമ്മുടെ സാമൂഹിക സാമ്പത്തിക വ്യവസ്ഥിതിയില് ഇപ്പോഴും പതിഞ്ഞു കിടപ്പുണ്ടെന്ന് മോദി പറഞ്ഞു.
മുത്തലാഖിന്റെ കാര്യത്തില് മുസ്ലീം സഹോദരിമാരും അമ്മമാരും എത്രയോ കാലമായി കഷ്ടപ്പെടുകയായിരുന്നു. വര്ഷങ്ങള് നീണ്ട പോരാട്ടത്തിനു ശേഷം അവര്ക്ക് മുത്തലാഖില് നിന്ന് മോചനം കിട്ടാനുള്ള വഴി തുറന്നിരിക്കയാണ്. ജ്യോതിബാ ഫുലേ, സാവിത്രീ ബായീ, രാജാ റാം മോഹന് റോയ്, ഈശ്വര് ചന്ദ്ര വിദ്യാസാഗര്, ദയാനന്ദ സരസ്വതി തുടങ്ങിയവരെപ്പോലുള്ളവര് സ്ത്രീകളുടെ അഭിമാന സംരക്ഷണത്തിനായി വലിയ പോരാട്ടങ്ങള് നടത്തി.
രാജ്യത്തെ സ്ത്രീകളുടെ അവകാശസംരക്ഷണത്തിനായി എത്ര മഹത്തായ കാല്വെയ്പ്പാണ് നടത്തിയിരിക്കുന്നതെന്നു കണ്ട് ഇന്ന് അവരുടെ ആത്മാക്കള് സന്തോഷിക്കുന്നുണ്ടാകും, മോദി പറഞ്ഞു.
പ്രതികരിക്കാൻ ഇവിടെ എഴുതുക: