തിരുവനന്തപുരം: കുട്ടികളില് മതതീവ്രവാദവും മതവിദ്വേഷവും വളര്ത്തുന്ന പാഠഭാഗങ്ങള് പഠിപ്പിച്ചതിന് അന്വേഷണം നേരിടുന്ന എറണാകുളത്തെ പീസ് ഇന്റര്നാഷണല് സ്കൂള് പൂട്ടാന് മുഖ്യമന്ത്രി പിണറായി വിജയന് ഉത്തരവിട്ടു. ജില്ലാ കളക്ടറുടേയും വിദ്യാഭ്യാസ വകുപ്പിന്റെയും ഉത്തരവുകള് പരിഗണിച്ചാണ് നടപടി.
എറണാകുളം ചക്കരപ്പറമ്പിനടുത്ത് പ്രവര്ത്തിക്കുന്ന സ്കൂള് പൂട്ടി വിദ്യാര്ഥികളെ സമീപത്തെ മറ്റു സ്കൂളുകളില് ചേര്ക്കാനാണ് മുഖ്യമന്ത്രിയുടെ നിര്ദേശം. കോഴിക്കോട് കേന്ദ്രമായ പീസ് ഫൗണ്ടേഷനു കീഴില് പീസ് ഇന്റര്നാഷണല് എന്ന പേരില് പത്തിലധികം സ്കൂളുകള് കേരളത്തിലുണ്ട്. സര്ക്കാര് നടപടി പീസ് ഫൗണ്ടേഷന്റെ മറ്റു സ്കൂളുകള്ക്കും ബാധകമാണോയെന്ന് അടുത്ത ദിവസം പുറത്തിറങ്ങുന്ന ഉത്തരവിലേ വ്യക്തതയുണ്ടാവൂ.
രണ്ടാംക്ലാസ് മുതല് മതവിദ്വേഷം കുത്തിവയ്ക്കുന്ന പാഠങ്ങളാണ് ഇവിടെ പഠിപ്പിച്ചു വരുന്നത്. ഇക്കാര്യം ശരിവച്ച് പൊതുവിദ്യാഭ്യാസ വകുപ്പ് ഡയറക്ടറും സെക്രട്ടറിയും മുഖ്യമന്ത്രിക്ക് റിപ്പോര്ട്ട് നല്കി. സിബിഎസ്ഇ അംഗീകാരത്തിനായുള്ള എന്ഒസി നല്കേണ്ടതില്ലെന്നും സര്ക്കാര് തീരുമാനിച്ചിട്ടുണ്ട്.
എറണാകുളം ജില്ലാ വിദ്യാഭ്യാസ ഓഫീസറുടെ പരാതിയെത്തുടര്ന്ന് 2016 ഒക്ടോബറിലാണ് സ്കൂളിനെതിരെ പൊലീസ് കേസെടുത്തത്. വ്യത്യസ്ത മതവിഭാഗങ്ങള്ക്കിടയില് ശത്രുത വളര്ത്തുന്നുവെന്നതാണ് പോലീസിന്റെ പ്രഥമിക റിപ്പോര്ട്ടിലുള്ളത്. വിദ്യാഭ്യാസ വകുപ്പു നടത്തിയ അന്വേഷണത്തില് എന്സിഇആര്ടിയോ, സിബിഎസ്ഇയോ, എസ്സിഇആര്ടിയോ നിര്ദേശിക്കുന്ന പാഠപുസ്തകങ്ങളല്ല ഇവിടെ പഠിപ്പിക്കുന്നതെന്നും കണ്ടെത്തിയിരുന്നു.
ഇസ്ലാമിക തീവ്രവാദം പ്രോത്സാഹിപ്പിക്കുന്ന പാഠപുസ്തകങ്ങളാണ് ഇവിടെ പഠിപ്പിക്കുന്നത് എന്നായിരുന്നു പരാതി. ഇതേത്തുടര്ന്ന് സ്കൂള് പ്രിന്സിപ്പല്, അഡ്മിനിസ്ട്രേറ്റര്, മാനേജിങ് കമ്മിറ്റി അംഗങ്ങള് എന്നിവര്ക്കെതിരേ പൊലീസ് കേസെടുത്തു. സ്കൂള് മാനേജിങ് ഡയറക്ടര് എം.എം അക്ബറിനെ വിദേശത്തുനിന്ന് എത്തിക്കാനുള്ള നടപടികളുമായി മുന്നോട്ടു പോകുകായണ് പൊലീസ് ഇപ്പോള്.
പ്രതികരിക്കാൻ ഇവിടെ എഴുതുക: