മറ്റുള്ളവരെ കുറ്റം കാണുന്ന ഉടന് കോപം കൊണ്ട് പൊട്ടിത്തെറിക്കരുത്. അവിടെ നിങ്ങളുടെ പെരുമാറ്റം കൊണ്ടുണ്ടായ തെറ്റെന്തെന്ന് ഒന്ന് ആത്മപരിശോധന ചെയ്യുകയാണാദ്യം വേണ്ടത്. ആത്മപരിശോധന ആത്മശുദ്ധീകരണത്തിലേക്കും ശാന്തിയിലേക്കും നിങ്ങളെ നയിക്കും. മറ്റുള്ളവരുടെ തെറ്റിനെ ചെറുതായും നിങ്ങളുടെ തെറ്റിനെ വലുതായും കാണാന് ശ്രമിക്കുക. സ്വയം തെറ്റുതിരുത്താന് ചൂണ്ടിക്കാട്ടുന്നവരെ മിത്രങ്ങളായും ക്ഷേമകാംക്ഷികളായും കരുതുക. എന്തെന്നാല് കാലിടറുന്ന നിങ്ങള്ക്ക് കരുതലോടെ മുന്നോട്ട് നീങ്ങാനുള്ള അടയാളം കാട്ടുകയാണവര്.
കാര്യമുണ്ടെങ്കിലും ഇല്ലെങ്കിലും അന്യരെ നിന്ദിക്കാനും താഴ്ത്തിക്കെട്ടാനുമുള്ള പ്രവണത ഇന്നെവിടെയുമുണ്ട്. ഇത് അപകടകരമായ പോക്കാണ്. ഈ ദുഃസ്വഭാവം മൂലം മറ്റുള്ളവരെ അംഗീകരിക്കാനും ആദരിക്കാനുമുള്ള വിശാല ഹൃദയത്വം മനുഷ്യര്ക്ക് നഷ്ടപ്പെട്ടുകൊണ്ടിരിക്കുന്നു. കൂടുതല് അറിവുള്ളവരെയും ആ അറിവ് പകര്ന്ന് തരുന്നവരെയും ബഹുമാനിക്കുന്ന ഏര്പ്പാടും നിലച്ചുപോയിരിക്കുന്നു. ചുരുങ്ങാന് പോകുന്ന മനസിനെ സ്നേഹശീതളമാക്കി വികസിപ്പിക്കുകമാത്രമാണ് ജീവിത വിജയത്തിനുള്ള ഒരേ ഒരു പോംവഴി.
മനോഹരമായി വസ്ത്രധാരണം ചെയ്ത് പുസ്തക സഞ്ചിയുമായി തിടുക്കത്തില് യാത്രചെയ്യുന്ന കുട്ടികളോടൊരുവാക്ക്. നന്മയായിരിക്കട്ടെ നിങ്ങളുടെ ഏറ്റവും വലിയ ആഭരണം. സത്യനിഷ്ഠയും സംയമനവും പ്രഭാതഭക്ഷണത്തെക്കാള് ശ്രേഷ്ഠമാണ്. നിയന്ത്രണവിധേയമായ ഒരു ജീവിതം ഇന്നുമുതല് തുടങ്ങി അതൊരു ശീലമാകട്ടെ. ആ ശീലം ഒരു പടച്ചട്ടപോലെ ഏതാപത്തില് നിന്നും നിങ്ങളെ രക്ഷിക്കും. എന്നും ഒരു നിശ്ചിതസമയത്ത് ഈശ്വരനാമജപവും പ്രാര്ത്ഥനയും നടത്തി ഈശ്വരമഹിമയില് മതിമയങ്ങി ധ്യാനിക്കുന്ന ശീലനം തുടരുകയാണെങ്കില് താമസിയാതെ അതിന്റെ സദ്ഫലങ്ങള് കാണാറാകും. ഫലം ആദ്യമുണ്ടാകട്ടെ. എന്നിട്ടു സാധനകള് ചെയ്യാം എന്ന് പറയരുത്. ഇപ്പോള് സാധന ചെയ്യൂ. പ്രതിഫലം നിറച്ച താലവുമായി കാലം ഒരുനാള് കടന്നുവരുമെന്നുറപ്പായി വിശ്വസിക്കുക.
– സത്യസായി ബാബ
പ്രതികരിക്കാൻ ഇവിടെ എഴുതുക: