വാഹനങ്ങള്‍ വാടകയ്‌ക്കെടുത്ത് പണം നല്‍കാതെ മുങ്ങിയതായി പരാതി

Thursday 8 February 2018 2:00 am IST

അങ്കമാലി: ചെന്നൈ ആസ്ഥാനമായി പ്രവര്‍ത്തിക്കുന്ന ട്രാവല്‍ ഏജന്‍സിയുടെ മറവില്‍ വാഹനങ്ങള്‍ വാടകയ്‌ക്കെടുത്ത് പണം നല്‍കാതെ മുങ്ങിയതായി പരാതി. തൃശൂര്‍ അയ്യന്തോള്‍ സ്വദേശിയും ചെന്നൈയില്‍ താമസമാക്കിയിട്ടുമുള്ള ജോണ്‍സണ്‍ ഫ്രാന്‍സീസ്(59) നെതിരെയാണ് പരാതി.

മുപ്പതോളം വാഹന ഉടമകളാണ് 65 ലക്ഷത്തിലധികം രൂപ ലഭിക്കാനുണ്ടെന്ന് കാണിച്ച് അങ്കമാലി പോലീസില്‍ പരാതി നല്‍കിയിട്ടുള്ളത്. കാര്‍, ടെമ്പോ ട്രാവലര്‍, ബസുകള്‍ തുടങ്ങിയ വാഹനങ്ങള്‍ മാസവാടകക്ക് എടുത്ത ശേഷം ടൂര്‍ ഓപ്പറേറ്റിംഗ് നടത്തുകയായിരുന്നു രീതി. മറ്റൊരു സ്ഥാപനത്തിലെ ജീവനക്കാരനായ ഇദ്ദേഹം ജോണ്‍സണ്‍ ട്രാവല്‍സ് ആന്‍ഡ് കണ്‍സള്‍ട്ടന്റസ് എന്ന സ്ഥാപനത്തിന്റെ മറവിലാണ് തട്ടിപ്പ് നടത്തിയതും പണവുമായി മുങ്ങിയതും. ടൂര്‍ ഓപ്പറേറ്റര്‍മാരില്‍ നിന്നും പണം വാങ്ങിയ ശേഷം വാഹന ഉടമകള്‍ക്ക് പണം നല്‍കിയില്ലെന്ന് പരാതിയില്‍ പറയുന്നു.

ടൂര്‍ സീസണായതിനാല്‍ വാഹന ഉടമകള്‍ പണം ഉടനടി ചോദിച്ചു വാങ്ങാതിരുന്നതിനെ തുടര്‍ന്നാണ് ഭീമമായ തുകയായി ഉയര്‍ന്നത്. ടൂര്‍ കമ്പനികളില്‍ നിന്നും പണമെല്ലാം കൈപ്പറ്റിയ ശേഷം ജോണ്‍സന്‍ കടന്നുകളയുകയായിരുന്നു. ടാക്‌സി വാഹനങ്ങള്‍ വാങ്ങിയ ശേഷം മാസവാടകക്ക് ജോണ്‍സന് നല്‍കിയ മുപ്പതോളം ഉടമകളാണ് തട്ടിപ്പിനിരയായത്.

 

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.