കുടുംബശ്രീ ചിക്കന്‍ ജില്ലാതല ഉദ്ഘാടനം 11ന്

Friday 9 February 2018 2:35 am IST

ജില്ലയിലെ 10 പഞ്ചായത്തുകളിലായി 13 കുടുംബശ്രീ ചിക്കന്‍ യൂനിറ്റുകളാണ് പ്രവര്‍ത്ത സജ്ജമാകുന്നത്്. ആരോഗ്യ സംരക്ഷണത്തില്‍ സുരക്ഷിത ഭക്ഷണത്തിന്റെ പ്രാധാന്യം ഉള്‍കൊണ്ടുള്ള പദ്ധതിയുടെ ജില്ലാതല ഉദ്ഘാടനം ജില്ലാ പഞ്ചായത്ത് ഹാളില്‍ 11ന് ഉച്ചയ്ക്ക് രണ്ടിന് എം.ബി.രാജേഷ് എംപി നിര്‍വഹിക്കും. ജില്ലാ പഞ്ചായത്ത് പ്രസിഡന്റ്  കെ.ശാന്തകുമാരി അദ്ധ്യക്ഷയാവും. കുമരംപുത്തൂര്‍, അയിലൂര്‍, ലെക്കിടി പേരൂര്‍, അനങ്ങനടി, മാത്തൂര്‍, കുത്തന്നൂര്‍, കാവശ്ശേരി, കോങ്ങാട്, ചെര്‍പ്പുളശ്ശേരി, വണ്ടാഴി പഞ്ചായത്തുകളിലാണ് ആദ്യഘട്ടത്തില്‍ പദ്ധതി നടപ്പാക്കുന്നത്. 

   ഒരു യൂണിറ്റില്‍ ആയിരം കോഴികള്‍ ഉണ്ടാകും. ഒരു ലക്ഷം രൂപയാണ് യൂണിറ്റിന് കുടുംബശ്രീ നല്‍കുന്ന സഹായം. കോഴി, തീറ്റ, മറ്റുപകരണങ്ങള്‍ എന്നിവ വാങ്ങാന്‍ ഈ തുക ഉപയോഗിക്കാം. കുറഞ്ഞത് 60 സെന്റ് സ്ഥലം ഉള്ളവര്‍ക്കേ യൂണിറ്റ് തുടങ്ങാന്‍ സാധിക്കൂ. നിലവില്‍ തുടങ്ങുന്നവയൊക്കെ വ്യക്തിഗത സംരംഭങ്ങളാണ്. 250 കോഴികളെ വീതം വളര്‍ത്താന്‍ ശേഷിയുള്ള നാലുപേര്‍ ചേര്‍ന്ന് ഒരു സംരംഭം തുടങ്ങാം. 

    രണ്ടാം ഘട്ടത്തില്‍ ഇത്തരം സംരംഭങ്ങളാകും തുടങ്ങുക. പൗള്‍ട്രി ഡെവലപ്‌മെന്റ് കോര്‍പറേഷന്റേയും മൃഗസംരക്ഷണ വകുപ്പിന്റേയും സഹകരണത്തോടെയാണ് കുടുംബശ്രീ പദ്ധതി നടപ്പാക്കുന്നത്. ഹോര്‍മോണ്‍ കുത്തിവെപ്പോ മറ്റ് ഹാനികരമായ മാര്‍ഗ്ഗങ്ങളോ ഇല്ലാതെയാണ് കോഴികളെ വളര്‍ത്തുക. കുടുംബശ്രീ ചിക്കന്‍ യൂണിറ്റുകള്‍ മാര്‍ച്ചോടെ 50 എണ്ണമായി വര്‍ദ്ധിപ്പിക്കുമെന്ന് കുടുംബശ്രീ ജില്ലാ മിഷന്‍ കോര്‍ഡിനേറ്റര്‍ പി. സൈതലവി അറിയിച്ചു. 

   കുടുംബശ്രീയുടെ ആഭിമുഖ്യത്തില്‍ മായകണ്ണാടി എന്ന തെരുവ് നാടകവും ഉദ്ഘാടന പരിപാടിയോടനുബന്ധിച്ച് നടക്കും. വനിതാ വികസനകോര്‍പ്പറേഷന്‍ ചെയര്‍പേഴ്‌സണ്‍ കെ.എസ്.സലീഖ, നഗരസഭ ചെയര്‍പേഴ്‌സണ്‍  പ്രമീള ശ്രീധരന്‍ എന്നിവര്‍ മുഖ്യാതിഥികളാകും.

 

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.