പാലക്കാട്: മധുവിനെ ആക്രമിക്കാന് ഒത്താശ ചെയ്തുകൊടുത്ത രണ്ട് വനം വകുപ്പ് ഉദ്യോഗസ്ഥരെ സസ്പെന്റ് ചെയ്തു. ഇവര് നോക്കി നില്ക്കെയാണ് മധുവിനെ നാട്ടുകാര് ക്രൂരമായി മര്ദ്ദിച്ചത്. നാട്ടുകാര്ക്ക് കാട്ടിനുള്ളിലേക്ക് പ്രവേശിക്കാന് അനുമതി കൊടുത്തതും ഈ ഉദ്യോഗസ്ഥരാണ്.
മധുവിനെ ആക്രമിക്കാന് എല്ലാ സഹായങ്ങളും നല്കിയത് വനംവകുപ്പ് ഉദ്യോഗസ്ഥരാണെന്ന് കൊല്ലപ്പെട്ട മധുവിന്റെ സഹോദരി ചന്ദ്രിക ആരോപിച്ചിരുന്നു. മധുവിനെ ആരവങ്ങളോടെയാണ് കാട്ടില് നിന്നും കൊണ്ടുവന്നത്. ആള്ക്കൂട്ടത്തിന് അകമ്പടിയായി വനംവകുപ്പിന്റെ ജീപ്പുമുണ്ടായിരുന്നു. ഉദ്യോഗസ്ഥര് നോക്കിനില്ക്കെയാണ് ക്രൂരപീഡനം നടന്നത്. അടികൊണ്ട് തളര്ന്ന മധു വെള്ളം ചോദിച്ചപ്പോള് ജനക്കൂട്ടം മൂക്കിലേക്ക് വെള്ളമൊഴിച്ച് നല്കിയതായും ചന്ദ്രിക വെളിപ്പെടുത്തിയിരുന്നു.
വനവാസികള് അല്ലാത്ത ആരെയും കാട്ടിനകത്തേക്ക് വനപാലകര് പ്രവേശിപ്പിക്കാറില്ല. അല്ലെങ്കില് തിരിച്ചറിയല് രേഖ നല്കണം. എന്നാല് ഇതൊന്നുമില്ലാതെയാണ് ഇരുപതോളം പേരെ വനംവകുപ്പ് അധികൃതര് കാട്ടിലേക്ക് പ്രവേശിപ്പിച്ചത്. കാട്ടില് കയറി മധുവിനെ ജനക്കൂട്ടത്തിന് കാണിച്ച് കൊടുത്തതും വനംവകുപ്പ് ഉദ്യോഗസ്ഥരാണെന്നും സഹോദരി ആരോപിച്ചു.
പ്രതികരിക്കാൻ ഇവിടെ എഴുതുക: