പോലീസിന്റെ വാഹന പരിശോധനയുമായി ബന്ധപ്പെട്ട് അപകടങ്ങള്, മരണം, ഗുരുതര പരിക്ക്, പോലീസുകാര്ക്ക് ബോധവല്ക്കരണം എന്നിങ്ങനെ പരാമര്ശമുണ്ട്.
മറവില് തിരിവില്നിന്ന് യാത്രക്കാരെ പിടിക്കുന്നു, പുറകെപോയി അപകടത്തില് ചാടിക്കുന്നു, വാഹനയാത്രക്കാരെ മരണത്തിലേക്കു തള്ളിവിടുന്നു, തെറിപറയുന്നു. ഇതൊക്കെയാണല്ലോ ആരോപണങ്ങള്.
സത്യത്തില് തെറ്റ് എവിടെയാണ്? പോലീസുകാര് അവരുടെ ജോലിയല്ലേ ചെയ്യുന്നത്? ഇവിടെ മാലിന്യം ഇടരുത് എന്നുപറയുന്ന സ്ഥലത്തു മാത്രം മാലിന്യം ഇടും. നോ പാര്ക്കിങ് ബോര്ഡിന് താഴെ പാര്ക്കുചെയ്യും. ഇവിടെ മൂത്രമൊഴിക്കരുത് എന്നെഴുതിയ സ്ഥലത്ത് മൂത്രമൊഴിച്ചും ചെരുപ്പ് ഇവിടെ ഇടരുത് എന്നെഴുതിയ ബോര്ഡിനു താഴെ ചെരിപ്പിട്ടും ശീലിച്ച നമുക്ക് ഹെല്മറ്റ് വയ്ക്കാനും വണ്ടിയുടെ കടലാസുകള് സൂക്ഷിക്കാനും പുക പരിശോധിക്കാനുമൊക്കെ മടിയാണ്.
അതുകൊണ്ടാണ് പോലീസിനെ കാണുമ്പോള് നിര്ത്താതെ പോകുന്നത്. കുടുംബമായി ഇരുചക്ര വാഹനത്തില് പോകുന്നവര് പോലും ഇങ്ങനെ ചെയ്യുന്നു.
കൈ കാണിച്ചാല് നിര്ത്താതിരുന്നവരുടെ പുറകെ പോയില്ലെങ്കില് പോലീസ് നിഷ്ക്രിയരാണെന്ന് പഴി പറയും. ദൂരെനിന്ന് േപാലീസിനെ കണ്ടാല് വാഹനയാത്രക്കാര് വഴിമാറിപ്പോകുന്നതുകൊണ്ടാണ് വളവിലും മറ്റും നില്ക്കുന്നത്. പോലീസ് പുറകെ പോകുമ്പോള് അപകടമുണ്ടാകുന്നത് നിയമലംഘകരുെട പരിഭ്രമംകൊണ്ടു മാത്രമാണ്. പോലീസിന് അവരുടെ ജോലി ചെയ്യാന് ആത്മവിശ്വാസം നല്കണം. എല്ലാ പോലീസുകാരും നല്ലവരാണെന്ന അര്ത്ഥത്തിലല്ല പറയുന്നത്. സമൂഹത്തിലെ എല്ലാത്തരം വ്യക്തിത്വങ്ങളുടെ പ്രതിനിധികളും പോലീസിലുമുണ്ടാകും.
കെ.ജി. ഉണ്ണികൃഷ്ണന്,
തൃപ്പൂണിത്തുറ
പ്രതികരിക്കാൻ ഇവിടെ എഴുതുക: