അമ്പലപ്പുഴ: നവീകരിച്ച അമ്പലപ്പുഴ ബ്ലോക്ക് ഓഫീസ് കെട്ടിടനിര്മ്മാണത്തില് അഴിമതിയുണ്ടെന്നാരോപിച്ച് ബിജെപി മാര്ച്ച് നടത്തി.
കെട്ടിട ഉദ്ഘാടനത്തില് നിന്നും കളക്ടര് വിട്ടുനിന്നതോടെ ബ്ലോക്ക് അധികൃതര് ചടങ്ങ് മാറ്റിവച്ചു. ഇന്നലെയാണ് നവീകരിച്ച കെട്ടിടത്തിന്റെ ഉദ്ഘാടനം നിശ്ചയിച്ചിരുന്നത്.
ബിജെപി അമ്പലപ്പുഴ മണ്ഡലം കമ്മിറ്റിയുടെ നേതൃത്വത്തിലായിരുന്നു മാര്ച്ച്. ദേശീയപാത വികസനത്തിന്റെ ഭാഗമായി അളന്നുതിരിച്ചിട്ട സ്ഥലത്ത് അരക്കോടി രൂപയോളം മുടക്കി കെട്ടിടം നിര്മ്മിച്ചതിന്റെ പിന്നില് വന്അഴിമതി ഉണ്ടെന്ന് ബിജെപി ആരോപിച്ചു.
രാവിലെ 10ന് കളര്കോട് ജങ്ഷനില് നിന്നാരംഭിച്ച മാര്ച്ച് ബ്ലോക്ക് ഓഫീസിന് മുന്നില് പോലീസ് തടഞ്ഞു. തുടര്ന്ന് നടന്ന പ്രതിഷേധയോഗം ജില്ലാ വൈസ് പ്രസിഡന്റ് എല്.പി. ജയചന്ദ്രന് ഉദ്ഘാടനം ചെയ്തു.
ഉദ്ഘാടകന് മന്ത്രി ജി. സുധാകരന് ദേഹാസ്വാസ്ഥ്യം അനുഭവപ്പെട്ടതിനെ തുടര്ന്നാണ് ചടങ്ങ് മാറ്റിവച്ചതെന്ന് അധികൃതര് പറയുന്നു. സിപിഎം ഭരിക്കുന്ന ബ്ലോക്ക് പഞ്ചായത്ത് നടത്തുന്ന എല്ലാ പ്രവര്ത്തനങ്ങളിലും വന്അഴിമതിയാണ് നടക്കുന്നതെന്നും ഇത് മരാമത്ത് മന്ത്രിയുടെ അറിവോടെയാണെന്നും പ്രതിഷേധയോഗം ഉദ്ഘാടനം ചെയ്ത എല്.പി. ജയചന്ദ്രന് ആരോപിച്ചു.
മാര്ച്ചിന് ബിജെപി നേതാക്കളായ വി. ശ്രീജിത്, വി.സി. സാബു, ആര്. കണ്ണന്, യു.കെ. സോമന്, ബിജു തുണ്ടില്, മുന്സിപ്പല് കൗണ്സിലര് ആര്. ഹരി തുടങ്ങിയവര് നേതൃത്വം നല്കി.
പ്രതികരിക്കാൻ ഇവിടെ എഴുതുക: