കൊച്ചി: ചില ചരിത്രകാരന്മാരും ക്രൈസ്തവ സഭകളും പ്രചരിപ്പിക്കുന്നതുപോലെ തോമാശ്ലീഹ (സെന്റ് തോമസ്) കേരളത്തില് വന്നിട്ടില്ലെന്ന് സിറോ മലബാര് സഭയുടെ മുന് വക്താവ് ഫാദര് പോള് തേലക്കാട്ട്. ക്രൈസ്തവ സഭകളില് ജാതി നിര്ണ്ണായക ഘടകമാണെന്നും തേലക്കാട് പറയുന്നു.
തോമാശ്ലീഹ ബ്രാഹ്മണരെ ക്രിസ്ത്യാനികളാക്കിയെന്ന തരത്തിലുള്ള മിത്തുകള് തകര്ക്കപ്പെടണമെന്ന് യാക്കോബായ സഭ നിരണം ഭദ്രാസനാധിപന് ഗീവര്ഗ്ഗീസ് മാര് കൂറിലോസിന്റെ ഫേസ്ബുക് പോസ്റ്റിനെക്കുറിച്ച് ന്യൂസ് സ്കൂപ് ഡോട് കോമിനോട് പ്രതികരിക്കുകയായിരുന്നു തേലക്കാട്ട്.
”ഒന്നാം നൂറ്റാണ്ടില് ഇവിടെ തോമാശ്ലീഹാ വന്ന് ബ്രാഹ്മണരെ മാമോദീസാ മുക്കിയെന്ന് പറയുന്നത് ശുദ്ധ അസംബന്ധം തന്നെയാണ്. അക്കാര്യം ബെനഡിക്ട് മാര്പാപ്പ പോലും ചൂണ്ടിക്കാട്ടിയിരുന്നു. എന്നാല് കേരളത്തിലെ ചില മതമേധാവികള് അതംഗീകരിക്കാന് തയ്യാറായില്ല. തോമാശ്ലീഹാ കേരളത്തിലെത്തിയെന്നതിന് വ്യക്തമായ തെളിവില്ല,” തേലക്കാട്ട് പറയുന്നു.
പോള് തേലേക്കാട്ട്
ക്രൈസ്തവ സഭകളില് മെത്രാനെ തിരഞ്ഞെടുക്കുമ്പോള് ജാതി നിര്ണ്ണായക ഘടകമാണെന്ന് തേലക്കാട് പറയുന്നു. ”ബ്രാഹ്മണ്യത്തിന്റെ കേരളത്തിലേക്കുള്ള വരവോടെയാണ് ക്രൈസ്തവര്ക്കിടയില് ജാതിയുടെ വേര്തിരിവുകള് കടന്നു വന്നത്. അത് ഇന്നും നിലനില്ക്കുന്നു. സുറിയാനി ക്രിസ്ത്യാനികളും ലത്തീന് ക്രിസ്ത്യാനികളും തമ്മില് സാമൂഹ്യപരമായ അന്തരം ഇന്നും നിലനില്ക്കുന്നുവെന്നത് യാഥാര്ത്ഥ്യമല്ലേ?” ”മാര്ക്സിസത്തിലും ക്രൈസ്തവതയിലും സവര്ണ്ണ ജാതിബോധം കടന്നു വന്നതോടെയാണ് രണ്ടിലും ജാതി കാഴ്ചപ്പാടുകള് വേരോടിത്തുടങ്ങിയത്. ഇഎംഎസും പി. ഗോവിന്ദപ്പിള്ളയും പേരിനൊപ്പം വാല് ചേര്ക്കുന്നത് ഈ സവര്ണ ജാതി ബോധം കൊണ്ടു തന്നെയാണെന്നതില് സംശയമില്ല,” തേലക്കാട്ട് വിശദീകരിക്കുന്നു.
യാക്കോബായ സഭാ ബിഷപ്പ് ഗീവര്ഗീസ് മാര് കൂറിലോസ്, താന് ഇനി കുടുംബയോഗ വാര്ഷികങ്ങളില് പങ്കെടുക്കില്ലെന്നും സഭയില് ജാതിമേധാവിത്തവും സ്വത്വവും പാരമ്പര്യവും ഊട്ടിയുറപ്പിക്കുന്ന കലപാരിപാടികളാണ് കുടുംബ യോഗങ്ങളെന്നും ഫേസ്ബുക്കില് എഴുതിയിരുന്നു. ബ്രാഹ്മണരെ തോമശ്ലീഹ മതം മാറ്റിയെന്നത് അബദ്ധമാണെന്നും ബിഷപ് എഴുതിയിരുന്നു.
ബിഷപ്പ് മാര് കൂറിലോസ്
” ഇനി മുതല് ‘കുടുംബയോഗ വാര്ഷികം ‘എന്ന പേരില് കേരളത്തില് മെയ്, ഡിസംബര് മാസങ്ങളില് നടക്കുന്ന പരിപാടികളില് പങ്കെടുക്കില്ല. കൃത്രിമമായി സൃഷ്ടിച്ചെടുത്ത ‘മേല്ജാതി’ സ്വത്വവും പാരമ്പര്യവും ഊട്ടി ഉറപ്പിക്കുവാനുള്ള കലാപരിപടികളാണ് ഇവയില് ഒട്ടേറെയും. ഒന്നുകില് പകലോമറ്റം, അല്ലെങ്കില് കള്ളിയാങ്കല് ഇങ്ങിനെ പോകും ഇവരുടെ എല്ലാവരുടെയും വേരുകള്! അവിടെയെല്ലാം ഉണ്ടായിരുന്ന ‘ഇല്ലങ്ങളി’ലെ ബ്രാഹ്മണരെ തോമാശ്ലീഹ ക്രിസ്ത്യാനികളാക്കിയവരാണ് ഈ കുടുംബങ്ങളുടെയെല്ലാം പൂര്വ്വികര് പോലും! ഇത്തരം അബദ്ധങ്ങള് എല്ലാം ചേര്ത്ത് കുടുംബ ചരിത്രം പുസ്തകവുമാക്കി വക്കും. അടിസ്ഥാന രഹിതവും സവര്ണ്ണ ജാതിബദ്ധവും പ്രതിലോമകരവുമായ ഈവിധ മിത്തുകള് തകര്ക്കപ്പെടണം – വ്യക്തിപരമായ അടുപ്പങ്ങള് കൊണ്ട് ഇത്തരം പല പരിപാടികളിലും പങ്കെടുക്കേണ്ടി വന്നിട്ടുണ്ട്: കുറ്റബോധമുണ്ട്. ഇനി ആവില്ല,” ബിഷപ് എഴുതി.
ചരിത്രകാരന് ഡോ. എം.ജി.എസ് നാരായണനും സെന്റ് തോമസ് കേരളത്തില് വന്നിട്ടില്ലെന്ന് സമര്ത്ഥിച്ചിട്ടുണ്ട്. ഇന്ത്യയിലോ കേരളത്തിലോ സെന്റ് തോമസ് വന്നിട്ടില്ലെന്നാണ് എംജിഎസിന്റെ വാദം. യുക്തിവാദിയായിരുന്ന ജോസഫ് ഇടമറുക് സെന്റ് തോമസ് കേരളത്തില്വന്നിട്ടില്ല എന്ന പേരില് പുസ്തകം പ്രസിദ്ധീകരിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: