കണ്ണൂര്: നവമാധ്യമങ്ങളുടെ ദുരുപയോഗം വര്ധിക്കുന്നതായി ജില്ലാ പഞ്ചായത്ത് പ്രസിഡന്റ് കെ.വി.സുമേഷ് പറഞ്ഞു. സമ്പൂര്ണ സാക്ഷരതാ പ്രഖ്യാപന വാര്ഷികവും സമഗ്ര, നവചേതന പദ്ധതികളുടെ ഉദ്ഘാടനവും ജില്ലാ പഞ്ചായത്ത് ഹാളില് നിര്വഹിച്ച് സംസാരിക്കുകയായിരുന്നു അദ്ദേഹം. ആധുനികമായ രീതികള് നിത്യജീവിതത്തിന്റെ ഭാഗമായിട്ടും അപരിഷ്കൃത ചിന്തകള് വളരുകയാണ്. കൊല്ലപ്പെട്ട പെണ്കുട്ടിയുടെ മതം നോക്കി പ്രതിഷേധത്തിന് പോലും വര്ഗീയമായ മുഖം നല്കുകയാണ്. ഇത് പരിഷ്കൃത സമൂഹത്തിന് ചേര്ന്നതല്ല. സാങ്കേതിക വിദ്യയില് അജ്ഞരായ പഴയ തലമുറയും പ്രാവീണ്യമുള്ള പുതിയ തലമുറയും തമ്മിലുള്ള വിടവ് വളരുകയാണ്. സാങ്കേതിക വിദ്യ അറിയാത്തവരാണ് പുതിയ കാലത്തെ നിരക്ഷരര്. അതിനാല് സാങ്കേതികവിദ്യ പഠ്ിപ്പിക്കാനും അതിനെ ജീവിതത്തിന്റെ ഭാഗമാക്കാനുമുള്ള പരിശീലനം സാക്ഷരതാമിഷന് ഏറ്റെടുക്കണമെന്നും പ്രസിഡന്റ് പറഞ്ഞു. ആദിവാസി സാക്ഷരതാ പദ്ധതി സമഗ്രയും പട്ടികജാതി സാക്ഷരതാ പദ്ധതി നവചേതനയും യഥാക്രമം നടുവില് ഉത്തൂര് കോളനിയിലെ പ്രേരക് ധന്യമോള് പ്രാന്, ട്യൂട്ടര് കക്കാട് കോളനിയിലെ റജിന എന്നിവര്ക്ക് പാഠപുസ്തകം നല്കി പ്രസിഡന്റ് ഉദ്ഘാടനം ചെയ്തു. മുന്കാല സാക്ഷരതാ പ്രവര്ത്തകരായ പയ്യന്നൂര് കുഞ്ഞിരാമന് മാസ്റ്റര്, വി.ആര്.വി.ഏഴോം, ഡോ. ജി. കുമാരന് നായര്, ബാലകൃഷ്ണന് മാസ്റ്റര് കൂത്തുപറമ്പ്, പി.കെ.കുഞ്ഞിക്കണ്ണന് ആറളം, മുകുന്ദന് മാസ്റ്റര് പായം, എന്.അശോകന് എന്നിവരെ പൊന്നാടയണിയിച്ച് ആദരിച്ചു.
മികച്ച രജിസ്ട്രേഷന് നടത്തിയ പ്രേരക്മാരായ പുഷ്പലത നടുവില്, പി.പുഷ്പ-ചപ്പാരപ്പടവ്, ഷജിത-ചിറക്കല്, വി.പി.ഷീല-മാടായി, രാധാമണി മാത്തില് എന്നിവര്ക്കുള്ള പുരസ്കാരം ചടങ്ങില് അധ്യക്ഷയായ ജില്ലാ പഞ്ചായത്ത് വൈസ് പ്രസിഡന്റ് പി.പി.ദിവ്യ നല്കി.
സ്ഥിരം സമിതി ചെയര്മാന്മാരായ കെ.പി.ജയബാലന്, ടി.ടി.റംല, വി.കെ സുരേഷ് ബാബു, മെമ്പര് അജിത് മാട്ടൂല്, ആസൂത്രണ സമിതി അംഗം കെ.വി.ഗോവിന്ദന്, ഡയറ്റ് പ്രിന്സിപ്പല് പി.യു രമേശന്, ജില്ലാ കോ-ഓര്ഡിനേറ്റര് ഷാജൂ ജോണ്, അസി. കോ-ഓര്ഡിനേറ്റര് എം.മുഹമ്മദ് ബഷീര് എന്നിവര് സംസാരിച്ചു.
പ്രതികരിക്കാൻ ഇവിടെ എഴുതുക: