കണ്ണൂര്: കാലവര്ഷം എത്തും മുന്പ് തന്നെ പനി ഉള്പ്പെടെയുള്ള പകര്ച്ചവ്യാധികളെ പ്രതിരോധിക്കാനുള്ള പ്രവര്ത്തനങ്ങളുമായി ആയുര്വ്വേദ വകുപ്പ്. ഇതിനായി ആയുര്വ്വേദ ഔഷധങ്ങളും, ജീവീതശൈലിയും പിന്തുടരണമെന്ന് ഭാരതീയ ചികിത്സാ വകുപ്പിന്റെ ജില്ലാ ടാസ്ക് ഫോഴ്സ് കമ്മിറ്റി അറിയിച്ചു.
വരള്ച്ച, കാലം തെറ്റിയുള്ള മഴ, അധികമഴ എന്നിവയാണ് പകര്ച്ചവ്യാധികളുടെ പ്രധാനകാരണം. ഇതിനൊപ്പം വ്യക്തി ശുചിത്വമില്ലായ്മ, പരിസര ശുചിത്വമില്ലായ്മ എന്നിവയും രോഗാണുക്കളുടേയും രോഗവാഹക ജീവികളുടേയും ആധിക്യത്തിന് കാരണമാകുന്നു. ഇതിലൂടെയാണ് പകര്ച്ചവ്യാധികള് സമൂഹത്തില് പടരുന്നതെന്നും ടാസ്ക് ഫോഴ്സ് കമ്മിറ്റി പറയുന്നു.
പ്രതിരോധ പ്രവര്ത്തനങ്ങള്ക്ക് ഭാരതീയ ചികിത്സാ വകുപ്പ് സജ്ജമായിട്ടുണ്ട്. ജില്ലയിലെ 11 ബ്ലോക്ക് പഞ്ചായത്തുകള് കേന്ദ്രീകരിച്ച് ആയുര്വ്വേദ മെഡിക്കല് ക്യാമ്പുകള്, ബോധവല്ക്കരണ ക്ലാസുകള് എന്നിവ നടത്തുന്നതിന് ബ്ലോക്ക് കണ്വീനര്മാരേയും പ്രവര്ത്തനങ്ങള് ഏകോപിപ്പിക്കാന് ടാസ്ക് ഫോഴ്സ് കണ്വീനറെയും നിയമിച്ചിട്ടുണ്ട്. തദ്ദേശ സ്ഥാപനങ്ങള്ക്കും സാംസ്കാരിക സംഘടനകള്ക്കും മെഡിക്കല് ക്യാമ്പുകളും ബോധവല്ക്കരണ ക്ലാസുകളും സംഘടിപ്പിക്കുന്നതിന് ഭാരതീയ ചികിത്സാ വകുപ്പിന്റെ ജില്ലാ ഓഫീസുമായോ ടാസ്ക് ഫോഴ്സ് ജില്ലാ കണ്വീനറുമായോ ബന്ധപ്പെടാവുന്നതാണ്. ഫോണ്: 0497 2700911, 9497609565.
പ്രതികരിക്കാൻ ഇവിടെ എഴുതുക: