ന്യൂദല്ഹി: രാജ്യാന്തര ഫുട്ബോള് മത്സരത്തില് ഇന്ത്യക്കായി 100 മത്സരങ്ങള് തികച്ച ഇന്ത്യന് താരം സുനില് ഛേത്രിക്ക് അഭിനന്ദന പ്രവാഹം.
കേന്ദ്രമന്ത്രി രാജ്യവര്ധന്സിങ് റാത്തോഡ്, ക്രിക്കറ്റ് ഇതിഹാസം സച്ചിന് ടെണ്ടുല്ക്കര്, യുവരാജ് സിംഗ്, മുഹമ്മദ് കൈഫ്, സിദ്ധാര്ത്ഥ് കൗള്, മലയാളി ഫുട്ബോള് താരം സി.കെ. വിനീത് തുടങ്ങിയ പ്രമുഖര് സമൂഹമാധ്യമങ്ങളിലൂടെ ഛേത്രിക്ക് അഭിനന്ദനങ്ങളുമായെത്തി.
ഇന്ത്യയ്ക്ക് വേണ്ടി നൂറ് മത്സരങ്ങള് കളിക്കുകയെന്നത് നിസാരമായ കാര്യമല്ല. ഇനിയുമൊരു നൂറ് മത്സരങ്ങള് കളിക്കാനുള്ള കരുത്ത് ഛേത്രിക്കുണ്ടെന്ന് എനിക്കറിയാം.. ഇന്ത്യന് ക്യാപ്റ്റന് എല്ലാ ആശംസകളും നേരുന്നു… സി.കെ. വിനീത് ട്വിറ്ററില് കുറിച്ചു. ഛേത്രിയുടേത് മഹത്തായ നേട്ടമാണെന്നും, മികച്ച വിജയം നേടിയ ടീമിനെ അഭിനന്ദിക്കുന്നതായും സച്ചിനും ട്വിറ്ററിലൂടെ പറഞ്ഞു. കഴിഞ്ഞ ദിവസം ഇന്റര് കോണ്ടിനന്റല് കപ്പില് കെനിയക്കെതിരെയായിരുന്നു ഛേത്രിയുടെ നൂറാമത് മത്സരം. ഈ മത്സരത്തില് രണ്ട് ഗോളുകളുമായി കളംനിറഞ്ഞ ഛേത്രിയുടെ മികവില് മറുപടിയില്ലാത്ത മൂന്ന് ഗോളുകള്ക്ക് ഇന്ത്യ തകര്പ്പന് വിജയം നേടി. 100 മത്സരങ്ങളില് നിന്ന് 61 ഗോളുകളായി ഇന്ത്യന് ക്യാപ്റ്റന്റെ നേട്ടം.
പ്രതികരിക്കാൻ ഇവിടെ എഴുതുക: