ഇരിട്ടി: നാട്ടുമധുരം നല്ല ഭക്ഷണം എന്ന സന്ദേശവുമായി കാക്കയങ്ങാട് പാല ഗവ. ഹയര് സെക്കന്ഡറി സ്കൂളില് സംഘടിപ്പിച്ച അഞ്ചാമത് ചക്ക മഹോത്സവം രുചിഭേദങ്ങളുടെ ഉത്സവമായി. ഇരിട്ടി ഗ്രീന്ലീഫിന്റെ സ്നേഹപച്ച ഹരിതവിദ്യാലയ പരിപാടിയുടെ ഭാഗമായി സംസ്ഥാന സര്ക്കാരിന്റെ ഹരിതകേരളം പദ്ധതിയുടെയും സംസ്ഥാന ജൈവ വൈവിധ്യ ബോര്ഡിന്റെയും സഹകരണത്തോടെ സ്കൂള് പിടിഎയുടെ നേതൃത്വത്തിലാണ് പരിപാടി നടന്നത്.
കൃത്യമായ മുന്നൊരുക്കങ്ങളോടെ പ്രീെ്രെപമറി മുതല് പത്താം തരം വരെയുള്ള 40 ക്ലാസുകളിലെ 1300 ഓളം വിദ്യാര്ഥികള് വീട്ടില് നിന്ന് തയ്യാറാക്കി കൊണ്ടുവന്ന മുന്നൂറോളം വ്യത്യസ്തങ്ങളായ ചക്ക വിഭവങ്ങള് പ്രദര്ശിപ്പിച്ചു. ഓരോ ക്ലാസിലും പ്രത്യേക ഉദ്ഘാടന ചടങ്ങും ചക്കയറിവ് പ്രദര്ശനവും ചക്കപ്പാട്ടുകളുടെ അവതരണവും നടന്നു. പ്ലാവിലയും പ്രകൃതിസൗഹൃദ വസ്തുക്കളും കൊണ്ട് ക്ലാസ് മുറികള് അലങ്കരിച്ചതും ശ്രദ്ധേയമായി.
ചക്കബ്രഡ്, ലഡു, പുഡ്ഡിങ്, വട, മധുരവട, ഇഡ്ഡലി, ചവിണിചിപ്സ്, ഉണ്ണിയപ്പം, മുറുക്ക്, ഹല്വ, കല്ത്തപ്പം, കിണ്ണത്തപ്പം, മസാലെ്രെഫ, ചിപ്സ്, പായസം, ജാം, കേക്ക്, അച്ചാര്, ഉപ്പുമാവ് തുടങ്ങിയ ഇനങ്ങളിലൂടെ പഴയകാലത്തിന്റെ പ്രധാന ഭക്ഷ്യവിഭവമായ ചക്കയെ പുതിയ കാലത്തിന്റെ രുചിഭേദങ്ങള്ക്കനുസൃതമായി തയ്യാറാക്കി അവതരിപ്പിച്ചു.
സംസ്ഥാന സര്ക്കാരിന്റെ ഹരിതകേരളം മിഷന്റെ ഭാഗമായി വിദ്യാലയങ്ങളില് നടപ്പാക്കുന്ന ഹരിതോത്സവത്തിന്റെ കൂടി ഭാഗമായാണ് ചക്ക മഹോത്സവം നടന്നത്. ഒരു സ്കൂളിലെ മുഴുവന് വിദ്യാര്ഥികളും വിഭവങ്ങള് തയ്യാറാക്കി എത്തിക്കുന്ന ചക്ക മഹോത്സവം സംസ്ഥാനത്തു തന്നെ ആദ്യത്തേത്താണെന്ന് സംഘാടകര് പറയുന്നു. ഓരോ വിഭവവും തയ്യാറാക്കുന്നതിന്റെ വിശദമായ പാചകകുറിപ്പും അതിന്റെ ഔഷധമൂല്യം അടക്കമുള്ള കാര്യങ്ങളും കുട്ടികള് എഴുതി പ്രദര്ശിപ്പിച്ചിരുന്നു. പോഷക സമ്പുഷ്ടമായ ഭക്ഷ്യവിഭവമായിട്ടും ആളുകള് പാഴാക്കി കളയുന്ന ചക്കയുടെ ഉപയോഗത്തിന്റെ പ്രാധാന്യം വിളിച്ചോതുന്ന പ്രദര്ശനം വിദ്യാര്ഥികളുടെ പാഠഭാഗവുമായും ബന്ധപ്പെട്ട രീതിയിലാണ് ക്രമീകരിച്ചത്.
മുഴക്കുന്ന് പഞ്ചായത്ത് പ്രസിഡന്റ് ബാബു ജോസഫ് ചക്ക പാട്ടു പാടി ഉദ്ഘാടനം ചെയ്തു. പിടിഎ പ്രസിഡന്റ് വി.വി.വിനോദ് അധ്യക്ഷത വഹിച്ചു. പഞ്ചായത്ത് അംഗങ്ങളായ കെ. കെ. സജീവന്, എം.വിനീത, മിനി ചന്ദ്രന്, കോഓര്ഡിനേറ്റര് സി.എ.അബ്ദുള്ഗഫൂര്, ഇരിട്ടി ഗ്രീന്ലീഫ് വൈസ് ചെയര്മാന് എന്.ജെ.ജോഷി, ജോയിന്റ് സെക്രട്ടറി പി.പി.രജീഷ്, നിര്വാഹകസമിതി അംഗം കെ.സി.ജോസ്, ഹരിതകേരള മിഷന് കണ്ണൂര് ജില്ലാ കോഓര്ഡിനേറ്റര് സോമശേഖരന്, ജൈവവൈവിധ്യ ബോര്ഡ് ജില്ലാ കോഓര്ഡിനേറ്റര് വി.സി.ബാലകൃഷ്ണന്, പ്രധാന അധ്യാപിക കെ.ആര്.വിനോദിനി, പ്രിന്സിപ്പല് പി.രവീന്ദ്രന്, എ.കെ.ഹസന്, സീനിയര് അസിസ്റ്റന്റ് സി.അബ്ദുള് അസീസ്, സ്റ്റാഫ് സെക്രട്ടറി എന്. ഗിരീഷ് ബാല, റോയി സെബാസ്റ്റ്യന്, എം. ആര്. മഞ്ജുഷ, പി.റമീസ്, ചന്ദന എന്നിവര് പ്രസംഗിച്ചു.
അടുത്ത വര്ഷം മുതല് ജൂണ് അഞ്ച് പരിസ്ഥിതി ദിനത്തോടനുബന്ധിച്ച് സംസ്ഥാനത്തെ മുഴുവന് സ്കൂളുകളിലും ചക്ക മഹോത്സവം സംഘടിപ്പിക്കണമെന്ന് ആവശ്യപ്പെട്ട് സര്ക്കാരില് നിവേദനം നല്കുന്നതിനും തീരുമാനിച്ചു.
പ്രതികരിക്കാൻ ഇവിടെ എഴുതുക: