മുംബൈ : പ്രമുഖ കെട്ടിട നിര്മാതാവിനെ ഭീഷണിപ്പെടുത്തി മൂന്നുകോടി രൂപ തട്ടിയെടുത്ത കേസില് കുപ്രസിദ്ധ അധോലോകനേതാവ് ദാവൂദ് ഇബ്രാഹിമിനും സഹോദരങ്ങള്ക്കുമെതിരെ കുറ്റപത്രം സമര്പ്പിച്ചു. ദാവൂദിനൊപ്പം സഹോദരങ്ങളായ ഇക്ബാല് കസ്കര്, അനീസ് ഇബ്രാഹിം എന്നിവര്ക്കെതിരെയാണ് താനെ ജില്ലാകോടതിയില് താനെ പോലീസിന്റെ പണാപഹരണംതടയല് സ്ക്വാഡ് കുറ്റപത്രം സമര്പ്പിച്ചത്.
ഒക്ടോബര് 2017 ലാണ് താനെ പോലീസ് ദാവൂദിന്റെ സഹോദരന് ഇക്ബാല് കസ്കറിനും ദാവൂദ് സംഘാംഗങ്ങള്ക്കുമെതിരെ കെട്ടിടനിര്മാതാവിന്റെ പരാതിയില് കേസെടുത്തത്. മുംബൈ ഗോറെ പ്രദേശത്തെ 38 ഏക്കര് സ്ഥലമിടപാടില് ഭീഷണിപ്പെടുത്തി മൂന്നുകോടി രൂപ തട്ടിയെടുത്തുവെന്നായിരുന്നു പരാതി. അന്വേഷണത്തില് ദാവൂദിനും മറ്റൊരു സഹോദരനായ അനീസിനും സംഭവത്തില് പങ്കുണ്ടെന്നു തെളിഞ്ഞു.
ആയിരം പേജുകളിലധികമുള്ള കുറ്റപത്രത്തില് സ്ഥലമിടപാട് രേഖകളും പണമിടപാടിന്റെ തെളിവുകളും സാക്ഷിമൊഴികളുമുണ്ട്. ദാവൂദിനെയും അനീസിനെയും പിടികിട്ടാപ്പുള്ളികളായാണ് കുറ്റപത്രത്തില് രേഖപ്പെടുത്തിയിരുക്കുന്നത്. ഇക്ബാല് കസ്കറിനെയും രണ്ട് സഹായികളെയും മറ്റൊരു കെട്ടിടനിര്മാതാവിനെ ഭീഷണിപ്പെടുത്തി 30 ലക്ഷവും നാലു ഫ്ളാറ്റുകളും കൈക്കലാക്കിയെന്ന കേസില് 2017 സപ്തംബറില് താനെ പോലീസ് അറസ്റ്റു ചെയ്തിരുന്നു.
പ്രതികരിക്കാൻ ഇവിടെ എഴുതുക: