യജ്ഞം മുതലായ കര്‍മ്മങ്ങള്‍ സാത്വികങ്ങളായി മാറ്റാന്‍ എളുപ്പവഴി

Sunday 1 July 2018 3:16 am IST

(17-ാം അധ്യായത്തിന്റെ തുടര്‍ച്ച)

അധ്യായം 17-23 ശ്ലോകം

യജ്ഞം, തപസ്സ്, ദാനം മുതലായ വൈദിക കര്‍മ്മങ്ങള്‍ സാത്ത്വികമായ രീതിയില്‍ തന്നെ നാം അനുഷ്ഠിക്കണം എന്നാണ് ഭഗവാന്‍ പറഞ്ഞത്. രാജസവും താമസവുമായ യജ്ഞാദികര്‍മ്മങ്ങള്‍ നാംഉപേക്ഷിക്കുക തന്നെ വേണം. യജ്ഞാദി കര്‍മ്മങ്ങള്‍ ചെയ്യുമ്പോള്‍- സാത്ത്വികമായ ആഹാരങ്ങള്‍ കഴിച്ചു ശീലിച്ച് മനസ്സില്‍ സത്ത്വഗുണം വളര്‍ത്തിയ അനുഷ്ഠാതാക്കള്‍ തന്നെ, കഴിഞ്ഞ ജന്മങ്ങളിലെ കര്‍മ്മങ്ങളുടെ പാ

പഫലമായി, ശാസ്ത്രവിധികള്‍ക്ക് വിരുദ്ധമായി, ആചരണത്തില്‍ തെറ്റുപറ്റാം. ദേശം, കാലം, ദ്രവ്യങ്ങള്‍, മന്ത്രോച്ചാരണങ്ങള്‍, ക്രിയാക്രമങ്ങള്‍ ഇവയില്‍ പിഴവ് സംഭവിച്ചേക്കാന്‍ സാധ്യതയുണ്ട്. അങ്ങനെ സംഭവിച്ചാല്‍ യജ്ഞ-തപോദാനങ്ങള്‍ അപൂര്‍ണങ്ങളായി തീരുകയാല്‍- പ്രത്യവായം- എന്ന ദോഷം സംഭവിക്കും. ആ ദോഷം സംഭവിച്ച്, നമ്മുടെ പരമപാദപ്രാപ്തിക്ക് തടസ്സമാകാതിരിക്കാന്‍ ഭഗവാന്‍ ലളിതമായ മാര്‍ഗ്ഗം ഉപദേശിക്കുന്നു.

ഓം, തത്, സത് ഇതി ബ്രഹ്മണഃ

ത്രിവിധഃ നിര്‍ദ്ദേശം

പരമതത്വത്തിന്റെ വിവരണങ്ങള്‍ ഉള്‍ക്കൊള്ളുന്ന മൂന്ന് നാമങ്ങള്‍ (= നിര്‍ദ്ദേശങ്ങള്‍- ആണ് ഓം, തത്, സത്- എന്നു മൂന്നു പദങ്ങള്‍.-'ഓം' എന്നതുകൊണ്ട് ബ്രഹ്മഭാവത്തെയും, 'തത്' എന്നതുകൊണ്ട് പരമാത്മഭാവത്തെയും 'സത്' എന്നതുകൊണ്ട് പുരുഷോത്ത മനായ  ശ്രീകൃഷ്ണ ഭഗവാനെയും വിവരിക്കുന്നു. അങ്ങനെ മൂന്ന് നാമങ്ങള്‍. വേദാന്തവേദികളായ ഉദ്ദാലകന്‍ മുതലായ മഹര്‍ഷികള്‍ പ്രകീര്‍ത്തിച്ചിരിക്കുന്നു- (=സ്മൃതഃ)

വേദങ്ങളിലും പ്രകീര്‍ത്തിച്ചിരിക്കുന്നു-

ഋഗ്വേദത്തില്‍-

'ഓം' ഇത്യേതത് ബ്രഹ്മണോ

നേദിഷ്ടം നാമ (=ഓം എന്നത് ബ്രഹ്മത്തിന്റെ നാമമാണ്). വേദങ്ങളില്‍ പലേടത്തും ഓങ്കാരം പ്രയോഗിച്ചുകാണാം.

ഛാന്ദോഗ്യോപനിഷത്തില്‍-

'തത്ത്വമസി'- (6-8-7)

(= പ്രപഞ്ചത്തിന്റെ കാരണമാകയാലും, അതിപ്രസിദ്ധമാകയാലും, അവിദ്വാന്മാര്‍ക്ക് പ്രത്യക്ഷമല്ലാത്തതുകൊണ്ടും 'തത്' എന്ന പദം പരമാത്മ തത്ത്വത്തെ പ്രതിപാദിക്കുന്നു.

ഛാന്ദോഗ്യോപനിഷത്തില്‍ 'സത്' എന്ന പദം- സദേവ സൗമ്യ (6-2-1)

(=പരമാര്‍ഥവും സദാ നിലനില്‍ക്കുന്നതും പ്രശസ്തവുമായ വസ്തുവിനെ-സത്- എന്നു പറയാം- അതായത് ഭഗവാന്‍).

'ഓം തത് സത്- മൂന്നും ചേര്‍ത്തു ഒരു നാമം- തന്നെയാണ്. ഈ നാമം- ഓം തത് സത്- ഉച്ചരിച്ചാല്‍, അപൂര്‍ണ്ണമാവും. അസാത്ത്വികവുമായ വൈദികകര്‍മ്മങ്ങളും വൈദികമന്ത്രങ്ങളും പൂര്‍ണമായിത്തീരുന്നു; സാത്ത്വികമായിത്തീരുന്നു.

 

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.