തിരുവനന്തപുരം: സ്ത്രീകളെ കന്യാസ്ത്രീകള് കുമ്പസരിപ്പിക്കണമെന്നാവശ്യപ്പെട്ട് ചര്ച്ച് ആക്ട് ആക്ഷന് കൗണ്സില് വൈസ് ചെയര്പേഴ്സണും കേരള കത്തോലിക്കാ നവീകരണ പ്രസ്ഥാനത്തിന്റെ നിയമോപദേഷ്ടാവുമായ അഡ്വ. ഇന്ദുലേഖാ ജോസഫിന്റെ നേതൃത്വത്തില് സെക്രട്ടേറിയറ്റിനു മുന്നില് ധര്ണ നടത്തി. സ്ത്രീകളെ പുരോഹിതന്മാര് കുമ്പസരിപ്പിക്കുന്നത് നിരോധിക്കുന്നതിന് നിയമനിര്മാണം നടത്തുക, ചര്ച്ച് ആക്ട് നടപ്പിലാക്കുക തുടങ്ങിയ ആവശ്യങ്ങള് കൂടി ഉന്നയിച്ചായിരുന്നു ധര്ണ.
സ്ത്രീകളെ കന്യാസ്ത്രീകള് കുമ്പസരിപ്പിക്കുന്നതിലൂടെ ചൂഷണങ്ങള് തടയാന് കഴിയുമെന്ന് ഇന്ദുലേഖ പറഞ്ഞു. അതല്ലെങ്കില് കുമ്പസരിക്കുന്നയാളുടെ വ്യക്തിത്വം പുറത്തുപറയാതെ കുമ്പസരിപ്പിക്കുകയോ മുന്പ് സഭയില് നിലനിന്നിരുന്ന പിഴമൂളല് സമ്പ്രദായം പുനഃസ്ഥാപിക്കുകയോ വേണം. ഇക്കാര്യത്തില് സഭാനേതൃത്വം അടിയന്തരമായി തീരുമാനമെടുക്കണം. പുരോഹിതന്മാര് പ്രതിസ്ഥാനത്തു വരുന്ന കേസുകളില് സഭാ നേതൃത്വത്തിന്റെ സമ്മര്ദം കാരണം ശരിയായ അന്വേഷണം നടക്കുന്നില്ല. ഇതിനു ശാശ്വത പരിഹാരം കാണുന്നതിന് സര്ക്കാരും വനിതാ കമ്മീഷനും വിഷയത്തില് അടിയന്തരമായി ഇടപെടണമെന്നും അവര് ആവശ്യപ്പെട്ടു.
പ്രൊഫ. ജോസഫ് വര്ഗീസ്, അലോഷിയ ജോസഫ്, ലത്തീന്കത്തോലിക്ക ഐക്യവേദി പ്രസിഡന്റ് അഡ്വ. ജെയിംസ് ഫെര്ണാണ്ടസ്, സെബാസ്റ്റ്യന് തുടങ്ങിയവര് പങ്കെടുത്തു.
പ്രതികരിക്കാൻ ഇവിടെ എഴുതുക: