കോട്ടയം: ജലന്ധര് ബിഷപ്പ് ഫ്രാങ്കോ മുളയ്ക്കലിനെതിരായ പീഡനക്കേസിലെ നിര്ണായക തെളിവായ കന്യാസ്ത്രീയുടെ മൊബൈല് ഫോണ് കാണാതായി. ഫോണ് നഷ്ടമായതായി കന്യാസ്ത്രീ അന്വേഷണസംഘത്തെ അറിയിച്ചു. കേസിലെ സുപ്രധാന തെളിവായ ഫോണ് അപ്രത്യക്ഷമായതിന് പിന്നില് ബാഹ്യശക്തികളുടെ ഇടപെടല് ഉണ്ടെന്ന് കന്യാസ്ത്രീയും ബന്ധുക്കളും സംശയം പ്രകടിപ്പിച്ചിട്ടുണ്ട്.
കന്യാസ്ത്രീ നല്കിയ കത്തുകളില് ബിഷപ്പിനെതിരെ കാര്യമായ തെളിവുകള് ഇല്ലെന്നായിരുന്നു അന്വേഷക സംഘത്തിന്റെ വിലയിരുത്തല്. ഫോണിലെ തെളിവുകള് പരിശോധിച്ച് മുന്നോട്ടുപോകുന്നതിനായിരുന്നു പൊലീസ് സംഘത്തിന്റെ തീരുമാനം. ഇതിനിടെയാണ് ഫോണ് കാണാതായത്.
ജലന്ധറിലായിരുന്ന കാലത്ത് ഉപയോഗിച്ചിരുന്ന ഫോണിലായിരുന്നു സന്ദേശങ്ങള് ഉണ്ടായിരുന്നത്. പുതിയ ഫോണ് വാങ്ങിയതോടെ ജലന്ധറിലെ മഠത്തിലായിരുന്നു തെളിവടങ്ങിയ ഫോണ് സൂക്ഷിച്ചിരുന്നത്. ഇത് ഇപ്പോള് മുറിയില് കാണാനില്ലെന്നാണ് കന്യാസ്ത്രീ പോലീസിന് നല്കിയിട്ടുള്ള വിവരം.
തന്റെ കൈയില് കത്തുകളും ഫോണ് സംഭാഷണവും തെളിവായി ഉണ്ടെന്ന് പരാതിക്കാരി അന്വേഷണ സംഘത്തോടും മധ്യസ്ഥതയ്ക്ക് ശ്രമിച്ച വൈദികനോടും വെളിപ്പെടുത്തിയിരുന്നു. ഇതില് കത്തുകള് കഴിഞ്ഞ ദിവസം അന്വേഷക സംഘത്തിന് കൈമാറിയിരുന്നു.
പ്രതികരിക്കാൻ ഇവിടെ എഴുതുക: