ശ്രീനഗര്: ജമ്മു കശ്മീരില് കഴിഞ്ഞ മുപ്പതു മാസത്തിനുള്ളില് സൈനിക ക്യാമ്പുകളിലുണ്ടായ ഭീകരാക്രമണങ്ങളില് വീരമൃത്യു വരിച്ചത് 35 സൈനികര്. ആക്രമണങ്ങളില് 40 സൈനികര്ക്ക് പരിക്കേറ്റതായും പ്രതിരോധ മന്ത്രാലയത്തിന്റെ കണക്കുകള് വ്യക്തമാക്കുന്നു. 15 ഭീകരരും കൊല്ലപ്പെട്ടു.
2016 ല് മാത്രം അഞ്ച് സൈനിക ക്യാമ്പുകളിലായി നടന്ന ഭീകരാക്രമണത്തില് 26 സൈനികര് വീരമൃത്യു വരിച്ചതായി കേന്ദ്ര പ്രതിരോധ സഹമന്ത്രി സുഭാഷ് ഭാമ്റെ ലോക്്സഭയില് എഴുതി നല്കിയ മറുപടിയില് വിശദീകരിച്ചു. 2017 ല് മൂന്നും ഈ വര്ഷം ഇതുവരെ ആറും സൈനികര്ക്ക് ജീവന് നഷ്ടമായി. സൈനിക ക്യാമ്പുകള് ആക്രമിക്കപ്പെട്ടതിനെക്കുറിച്ച് വിശദമായ അന്വേഷണം നടത്തിയതായും മന്ത്രി ലോക്സഭയില് അറിയിച്ചു.
ഭീകരര്ക്കെതിരെയുള്ള പ്രതിരോധ നടപടികള് ശക്തമാക്കാന് കേന്ദ്രസര്ക്കാര് സുവ്യക്തമായ സുരക്ഷാ നിര്ദേശങ്ങള് നല്കിയിട്ടുണ്ടെന്നും അദ്ദേഹം പറഞ്ഞു. ഭീകരാക്രമണങ്ങളെക്കുറിച്ചും സുരക്ഷാ വീഴ്ചകളെക്കുറിച്ചും സൈനിക തലത്തിലും വിശദമായ അവലോകനം നടത്തിയതായി ഭാമ്റെ വ്യക്തമാക്കി.
പ്രതികരിക്കാൻ ഇവിടെ എഴുതുക: