ന്യൂദൽഹി: ലോക്സഭാ തിരഞ്ഞെടുപ്പ് തന്ത്രങ്ങളും കേരളാ എൻ.ഡി.എയിലെ പ്രശ്നങ്ങളും ചർച്ച ചെയ്യാൻ ബി.ഡി.ജെ.എസ് അദ്ധ്യക്ഷൻ തുഷാർ വെള്ളാപ്പള്ളി 9ന് ഡൽഹിയിൽ ബി.ജെ.പി ദേശീയ അദ്ധ്യക്ഷൻ അമിത് ഷായുമായി കൂടിക്കാഴ്ച നടത്തും. ശിവഗിരിയിലെ യദിപൂജാ ആഘോഷത്തിന് ക്ഷണിക്കാൻ തുഷാർ വെള്ളാപ്പള്ളി ഇന്നലെ പാർലമെന്റിൽ അമിത് ഷായെ കണ്ടപ്പോഴാണ് 9ന് വിശദ കൂടിക്കാഴ്ച നടത്താൻ തീരുമാനമായത്.
ബി.ജെ.പിയുമായി നിലവിൽ അഭിപ്രായ വ്യത്യാസങ്ങളില്ലെന്നും താൻ ഇപ്പോഴും കേരളാ എൻ.ഡി.എ കൺവീനറായി തുടരുന്നത് അതിനു തെളിവാണെന്നും കൂടിക്കാഴ്ചയ്ക്കു ശേഷം തുഷാർ വെള്ളാപ്പള്ളി പറഞ്ഞു. എന്നാൽ എൻ.ഡി.എ കേരളത്തിൽ സജീവമല്ല. ചെങ്ങന്നൂർ ഉപതിരഞ്ഞെടുപ്പിലെ കാര്യങ്ങൾ ഏവരും കണ്ടതാണല്ലോ എന്നും തുഷാർ പറഞ്ഞു. അടുത്ത ലോക്സഭാ തിരഞ്ഞെടുപ്പിൽ വിഷയം ലക്ഷ്യമിടുന്ന മണ്ഡലങ്ങൾ കേന്ദ്രീകരിച്ച് പ്രവർത്തനം തുടങ്ങുന്ന കാര്യങ്ങൾ അമിത് ഷായുമായി ചർച്ച ചെയ്യും.
സംസ്ഥാന ബി.ജെ.പിയിൽ പി. എസ്. ശ്രീധരൻ പിള്ളയുടെ നേതൃത്വത്തിൽ പ്രതീക്ഷയുണ്ട്. അദ്ദേഹവുമായി ചർച്ച നടത്തിയിരുന്നു. പൊതുസമ്മതൻ എന്ന നിലയിൽ അദ്ദേഹത്തിന് മികച്ച പ്രകടനം കാഴ്ചവയ്ക്കാൻ കഴിയുമെന്നാണ് പ്രതീക്ഷയെന്നും തുഷാർ പറഞ്ഞു.
പ്രതികരിക്കാൻ ഇവിടെ എഴുതുക: