തിരുവനന്തപുരം: പ്രളയക്കെടുതിയില് വൈദ്യുതി മുടങ്ങിയ പ്രദേശങ്ങളില് വൈദ്യുതി വിതരണം യുദ്ധകാലാടിസ്ഥാനത്തില് പുന:സ്ഥാപിക്കുമെന്ന് വൈദ്യുതി ബോര്ഡ് അറിയിച്ചു.
28 സബ്.സ്റ്റേഷനുകളും അഞ്ച് ഉത്പാദന നിലയങ്ങളും പ്രവര്ത്തനം നിര്ത്തി വെയ്ക്കേണ്ടി വന്നു. അഞ്ചു ചെറുകിട വൈദ്യുതി നിലയങ്ങള് തകരുകയും ചെയ്തു. 350 കോടി രൂപയുടെ നഷ്ടത്തിനു പുറമെ വൈദ്യുതി ബോര്ഡിന് ഏകദേശം 470 കോടി രൂപയുടെ വരുമാന നഷ്ടവും ഉണ്ടായി.
പതിനായിരം ട്രാന്സ്ഫോര്മറുകള് വെള്ളപ്പൊക്കവും പേമാരിയും മൂലം അപകടം ഒഴിവാക്കാനായി ഓഫ് ചെയ്തു. ഇതുവരെയായി 4500ത്തോളം എണ്ണം ചാര്ജ്ജ് ചെയ്തു. ബാക്കിയുള്ളവയില് 1200ത്തോളം ട്രാന്സ്ഫോര്മറുകള് വെള്ളത്തില് മുങ്ങിയ അവസ്ഥയിലാണ്.
വൈദ്യുതി വിതരണ സംവിധാനം തകര്ന്ന പ്രദേശങ്ങളില് അവ പുനരുദ്ധരിക്കുന്നതിനുള്ള നടപടികളും ആരംഭിച്ചിട്ടുണ്ട്. വയറിങ് സംവിധാനങ്ങളുടെയും പൊതുജനങ്ങളുടെയും സുരക്ഷ ഉറപ്പാക്കിയ ശേഷം എത്രയും പെട്ടെന്ന് കണക്ഷനുകള് പുന:സ്ഥാപിക്കും.
തകര്ന്ന വൈദ്യുതി വിതരണ സംവിധാനത്തിന്റെ പ്രവര്ത്തനങ്ങള് കൃത്യമായി ഏകീകരിച്ച് നടപ്പിലാക്കാന് ‘മിഷന് റീകണക്റ്റ്’ എന്ന പേരില് ടാസ്ക് ഫോഴ്സ് രൂപീകരിച്ചു. വിതരണവിഭാഗം ഡയറക്ടറുടെ മേല് നോട്ടത്തില് തിരുവനന്തപുരം വൈദ്യുതി ഭവനില് 24 മണിക്കൂറും പ്രത്യേക വിഭാഗം ഇതിനായി പ്രവര്ത്തിക്കും. കല്പറ്റ, തൃശ്ശൂര്, ഇരിഞ്ഞാലക്കുട, പെരുമ്പാവൂര്, എറണാകുളം, തൊടുപുഴ, ഹരിപ്പാട്, ആലപ്പുഴ, പത്തനംതിട്ട എന്നീ ഇലക്ട്രിക്കല്
സര്ക്കിളുകളില് ഡെപ്യൂട്ടി ചീഫ് എന്ജിനീയര്മാരുടെ നേതൃത്വത്തിലും, പ്രശ്ന ബാധിത പ്രദേശങ്ങളിലെ സെക്ഷനുകളില് അസിസ്റ്റന്റ് എക്സിക്യൂട്ടീവ് എന്ജിനീയര്മാലരുടെ നേതൃത്വത്തിലും പ്രത്യേക സമിതികള് പുനരുദ്ധാരണ പ്രവര്ത്തികള്ക്ക് മേല്നോട്ടം നല്കും.
സര്വീസില് നിന്നും വിരമിച്ച ജീവനക്കാരുടേയും മറ്റ് ഇലക്ട്രിക്കല് സെക്ഷനില് നിന്നുള്ള ജീവനക്കാരുടെയും കരാറുകാരുടെയും സേവനവും ലഭ്യമാക്കും. തമിഴ്.നാട്, കര്ണ്ണാടക, തെലുങ്കാന തുടങ്ങിയ സംസ്ഥാനങ്ങളില് നിന്നും ജീവനക്കാരെയും ട്രാന്സ്ഫോര്മറുകള് അടക്കമുള്ള സാധനങ്ങളും നല്കാമെന്ന് അറിയിച്ചിട്ടുണ്ട്. പവര് ഗ്രി ഡ്, എന്.ടി.പി.സി, റ്റാറ്റാ പവര്, എല് ആന്ഡ് ടി, തുടങ്ങിയ സ്ഥാപനങ്ങളും സഹായം വാഗ്ദാനം ചെയ്തിട്ടുണ്ട്.
കണക്ഷന് പുന:സ്ഥാപിക്കാന് താമസം നേരിടുന്ന വീടുകളില് എര്ത്ത് ലീക്കേജ് സര്ക്ക്യൂ ട്ട് ബ്രേക്കര് ഉള്പ്പടുത്തി ഒരു ലൈറ്റ് പോയിന്റും, പ്ലഗ് പോയിന്റും മാത്രമുള്ള താല്ക്കാലിക സംവിധാനത്തിലൂടെ വൈദ്യുതി നല്കാന് ബോര്ഡ് തീരുമാനിച്ചിട്ടുണ്ട്.
തെരുവ് വിളക്കുകള് കേടായ ഇടങ്ങളില് തദ്ദേശസ്വയംഭരണ സ്ഥാപനങ്ങള് സാധനങ്ങള് നല്കുന്ന മുറയ്ക്ക് സ്ഥാപിച്ച് നല്കും. സെക്ഷന് ഓഫീസുകള്, റിലീഫ് ക്യാമ്പുകള് മറ്റ് പൊതു ഇടങ്ങള് എന്നിവിടങ്ങളിലെല്ലാം പൊതുജനങ്ങള്ക്ക്് സൗജന്യമായി മൊബൈല് ഫോണ് ചാര്ജ്ജ് ചെയ്യാനുള്ള സംവിധാനവും ഏര്പ്പെടുത്തും
വെള്ളപ്പൊക്കത്തില് തകരാറിലായ ട്രാന്സ്ഫോര് സ്റ്റേഷനുകള് പുനരുദ്ധരിക്കുന്ന ജോലികള്ക്കാവും പ്രഥമ പരിഗണന. വൈദ്യുതി ബോര്ഡ് പത്രക്കുറിപ്പില് അറിയിച്ചു
പ്രതികരിക്കാൻ ഇവിടെ എഴുതുക: