സെവിയ: ആക്രമിച്ചു കളിച്ച സെവിയക്ക് മുന്നില് യൂറോപ്യന് ചാമ്പ്യന്മാരായ റയല് മാഡ്രിഡിന് അടിതെറ്റി. ലാലിഗയില് ഏകപക്ഷീയമായ മൂന്ന്് ഗോളുകള്ക്കാണ് സെവിയ റയല് മാഡ്രിഡിനെ അട്ടിമറിച്ചത്. ഈ സീസണില് റയലിന്റെ ആദ്യ തോല്വി.
പതിനേഴാം മിനിറ്റില് ഗോള് നേടി പോര്ച്ചുഗീസ് സ്ട്രൈക്കര് ആന്ദ്രെ സില്വ സെവിയയ്ക്ക് മികച്ച തുടക്കം സമ്മാനിച്ചു. പോസ്റ്റിന് വളരെ അടുത്തുനിന്നുളള സില്വയുടെ ഷോട്ട് റയലിന്റെ വല കുലുക്കി.
നാലു മിനിറ്റുകള്ക്ക് ശേഷം രണ്ടാം ഗോളിലുടെ സില്വ സെവിയയുടെ ലീഡ് 2-0 ആക്കി. ഇടവേളയ്ക്ക് ആറു മിനിറ്റുള്ളപ്പോള് സെവിയയുടെ മൂന്നാം ഗോളും പിറന്നു. ബെന് യെഡ്ഡറുടെ ഹെഡറാണ് റയല് ഗോളിയെ മറികടന്ന് വലയില് പതിച്ചത്.
ഈ സീസണില് പുതിയ കോച്ച് ജുലന് ലോപേടെഗ്വിയുടെ ശിക്ഷണത്തില് കളിക്കുന്ന റയല് മാഡ്രിഡിന്റെ ലാലിഗയിലെ ആദ്യ തോല്വിയാണിത്. നേരത്തെ ബാഴ്്സ ലീഗന്സിനോട് തോറ്റതോടെ റയലിന് പോയിന്റ് നിലയില് മുന്നിലെത്താന് അവസരമൊരുങ്ങിയതാണ്. എന്നാല് സെവിയയോട് തോറ്റതോടെ രണ്ടാം സ്ഥാനത്ത് തുടരുകയാണ് റയല്. ആറു മത്സരങ്ങളില് അവര്ക്ക് പതിമൂന്ന് പോയിന്റുണ്ട്.
പ്രതികരിക്കാൻ ഇവിടെ എഴുതുക: