യുണൈറ്റഡ് നേഷന്സ്: പെഷവാറിലെ സൈനിക സ്കൂള് ആക്രമണത്തില് ഇന്ത്യയ്ക്ക് പങ്കുണ്ടെന്ന പാകിസ്ഥാന്റെ വാദത്തിന് ഐക്യരാഷ്ട്ര സഭാ പൊതുസമ്മേളനത്തില് ഇന്ത്യയുടെ ശക്തമായ മറുപടി. പ്രധാനമന്ത്രി ഇമ്രാന് ഖാന്റെ നേതൃത്വത്തിലുള്ള പുതിയ സര്ക്കാര് പാകിസ്ഥാനിലെ പഴയ സര്ക്കാരിനെ പോലെ തന്നെയാണെന്ന് യു.എന്നിലെ ഇന്ത്യയുടെ ഫസ്റ്റ് സെക്രട്ടറി ഈനം ഗംഭീര് പറഞ്ഞു.
2014ലെ പെഷവാര് സ്കൂള് ആക്രമണത്തില് ഇന്ത്യയ്ക്ക് പങ്കുണ്ടെന്ന പാക് വിദേശകാര്യമന്ത്രി ഷാ മുഹമ്മദ് ഖുറേഷിയുടെ ആരോപണം ഇന്ത്യ തള്ളി. യു.എന് ആഗോള തീവ്രവാദ പട്ടികയില് പെടുത്തിയ 132 തീവ്രവാദികളെ അതിഥികളായി കാണുകയും അവരെ സംരക്ഷിക്കുകയുമാണ് പാകിസ്ഥാന് ചെയ്യുന്നത്.
സ്കൂള് ആക്രമണത്തിനിടെ 150 കുട്ടികള് മരിക്കാനിടയായ സംഭവത്തില് ഇന്ത്യയ്ക്കുണ്ടായ ദു:ഖം രേഖപ്പെടുത്തുന്നതിന് പാര്ലമെന്റിന്റെ ഇരുസഭകളും രണ്ട് മിനിട്ട് മൗനമാചരിച്ചിരുന്നു. ഖുറേഷി ഇപ്പോള് ഉന്നയിച്ച ആരോപണം നിഷ്കളങ്കരായ ആ കുട്ടികളുടെ ഓര്മയെ അവഹേളിക്കുന്നതാണ് – ഈനം പറഞ്ഞു.
സ്വയം സൃഷ്ടിച്ച ഭീകരതയുടെ നീരാളിപ്പിടിത്തത്തില് നിന്ന് ശ്രദ്ധ തിരിക്കാനുള്ള പാകിസ്ഥാന്റെ ശ്രമമാണ് ഇപ്പോള് നടക്കുന്നത്. അയല്രാജ്യങ്ങളെ അസ്ഥിരപ്പെടുത്താനും അവരുടെ അതിര്ത്തികള് പിടിച്ചടക്കാനുമാണ് ഭീകരരുടെ സഹായം പാകിസ്ഥാന് തേടിയതെന്നും ഈനം പറഞ്ഞു.
ഭീകരതയ്ക്കെതിരെ പോരാടുന്നുവെന്നാണ് പാകിസ്ഥാന് പറയുന്നത്. എന്നാല് വസ്തുത മറിച്ചാണ്. 132 തീവ്രവാദികള്ക്ക് പാലും പഴവും നല്കി ഊട്ടിവളര്ത്തുന്നില്ലെന്ന് പാകിസ്ഥാന് പറയാന് കഴിയുമോയെന്നും അവര് ചോദിച്ചു. യു.എന് പട്ടികയിലുള്ള കൊടുംതീവ്രവാദിയായ ഹഫീസ് സയിദ് പാകിസ്ഥാനില് സൈ്വര്യസഞ്ചാരം നടത്തുന്നില്ലെന്ന് പാകിസ്ഥാന് പറയാനാകുമോയെന്നും ഈനം ചോദിച്ചു.
പ്രതികരിക്കാൻ ഇവിടെ എഴുതുക: