രാജ്കോട്ട് (ഗുജറാത്ത്): മോഹന്ദാസ് കരം ചന്ദ് ഗാന്ധി ജനിച്ചത് പോര്ബന്തറിലാണ്. പക്ഷേ, ഏഴാം വയസുമുതല് വളര്ന്നത് രാജ്കോട്ടിലാണ്. ഗാന്ധിജി ആയി മാറിയതുള്പ്പെടെ ജീവിതത്തിന്റെ നിര്ണായക ഘട്ടങ്ങളും തീരുമാനങ്ങളും മഹാത്മജി കൈക്കൊണ്ടതും രാജ്കോട്ടിലാണ്.
ഗാന്ധിജിയുടെ നൂറ്റമ്പതാം ജന്മവര്ഷം ഒരു വര്ഷത്തെ പരിപാടികളുമായി ആഘോഷിക്കാനാണ് നരേന്ദ്ര മോദി സര്ക്കാരിന്റെ തീരുമാനം. 2018 ഒക്ടോബര് രണ്ടിന് പ്രധാനമന്ത്രി പരിപാടികള്ക്ക് ഉജ്വലതുടക്കം കുറിക്കും. നൂറ്റമ്പതാം ജന്മവര്ഷത്തില് ഗാന്ധിജിക്കുള്ള സമ്പൂര്ണ സ്മാരകമാണ് സപ്തംബര് 30 ന് പ്രധാനമന്ത്രി ഉദ്ഘാടനം ചെയ്ത രാജ്കോട്ട് മഹാത്മാ ഗാന്ധി മ്യൂസിയം.
മ്യൂസിയം ലോക നിലവാരത്തിലാണ്. ഗാന്ധിജിയുടെ ജീവിതം, ഗാര്ഗം, തത്ത്വം, ലക്ഷ്യം, ഉദ്ബോധനം, മാതൃക തുടങ്ങി സമസ്തവും ചിത്രവും ശില്പ്പവും വിവരണവും വിശദീകരണവുമായി മ്യൂസിയത്തില് ഒരുക്കിയിരിക്കുന്നു.
പരമ്പരാഗത സംവിധാനത്തിലും ഏറ്റവും ആധുനിക സംവിധാനങ്ങളിലും ഒരുക്കിയിരിക്കുന്ന മ്യൂസിയത്തില് സന്ദര്ശകരുടെ അഭിരുചിക്കനുസരിച്ച് ഗാന്ധിയെ അറിയാം എന്നതാണ് സവിശേഷത.
ആല്ഫ്രഡ് ഹൈസ്കൂളിലാണ് മ്യൂസിയം. 164 വര്ഷം പഴക്കമുള്ളതാണ് സ്കൂള്. രാജ്കോട്ട് മുനിസിപ്പല് കോര്പ്പറേഷന് (ആര്എംസി) 26 കോടി രൂപ ചെലവിലാണ് മ്യൂസിയം നിര്മിച്ചിരിക്കുന്നത്. ചരിത്രത്തിന്റെ വഴിയിലൂടെ, ഇന്ത്യന് സ്വാതന്ത്ര്യ സമര സംഭവങ്ങളിലൂടെ, ഗാന്ധിജീവിതത്തിലൂടെയുള്ള സഞ്ചാരമാണ് ഈ മ്യൂസിയത്തിന്റെ അന്തര്ഭാഗം.
പ്രവേശനം സൗജന്യമെന്നായിരുന്നു ആദ്യ തീരുമാനം. ഇപ്പോള് മുതിര്ന്നവര്ക്ക് 25 രൂപയും കുട്ടികള്ക്ക് 10 രൂപയുമെന്ന് നിശ്ചയിച്ചു.
ഗാന്ധിജിക്ക് സ്കൂളില് പ്രവേശനം അറിയിച്ചുള്ള കത്ത്, ഗാന്ധിജിയുടെ പേരുള്ള ഹാജര് പുസ്തകം, ഗാന്ധിജിയുടെ ക്ലാസ്മുറി എല്ലാം ഇവിടെയുണ്ട്. ക്ലാസ്മുറി ശില്പ്പങ്ങള് കൊണ്ട് പുനഃസൃഷ്ടിച്ചിരിക്കുന്നു. ഗാന്ധിജിയും കുട്ടികളും ഇരിക്കുന്ന മറ്റൊരു മുറിയും ശില്പ്പങ്ങള്കൊണ്ട് പുനരവതരിപ്പിച്ചിട്ടുണ്ട്. വന് പുസ്തക ശേഖരം, ഗ്രന്ഥങ്ങള്, അപൂര്വ രേഖകള് എല്ലാം ശേഖരിച്ചിരിക്കുന്നു.
പുതു തലമുറയിലെ കുട്ടികള്ക്കും യുവജനങ്ങള്ക്കും പ്രിയപ്പെട്ട ത്രീഡി സംവിധാനത്തിലും ഡിജിറ്റലിലുമുള്ള പ്രദര്ശനങ്ങള് ഒരുക്കിയിട്ടുണ്ട്.
നൂറ്റമ്പത് വര്ഷത്തിനിടെ ഗാന്ധിജിയെക്കുറിച്ച് ഒരുക്കിയിട്ടുള്ള ഏറ്റവും മികച്ച മ്യൂസിയമാണിത്.
പ്രതികരിക്കാൻ ഇവിടെ എഴുതുക: