തിരുവനന്തപുരം : കേരളത്തിലെ എല്ലാ ഡാമുകളുടെയും പരമാവധി ജലനിരപ്പ് നിര്ണയിക്കുന്നത് സംബന്ധിച്ച് ഹൈഡ്രോളജി പഠനം നടത്തേണ്ടതുണ്ടെന്ന് അണക്കെട്ടുകളുടെയും ബാരേജുകളുടെയും പ്രവര്ത്തനം പഠിക്കാന് നിയോഗിക്കപ്പെട്ട സമിതി. പ്രളയത്തെ തുടര്ന്ന് ഡാമുകളുടെ പ്രവര്ത്തനം പഠിക്കാന് നിയോഗിച്ച സമിതി മുഖ്യമന്ത്രി പിണറായി വിജയന് റിപ്പോര്ട്ട് സമര്പ്പിച്ചു. അന്താരാഷ്ട്ര ഡാം സുരക്ഷാ വിദഗ്ധന് ഡോ. ബാലു അയ്യര്, കെ.എ. ജോഷി (ചീഫ് എഞ്ചിനീയര്, ജലസേചനം) ബിബിന് ജോസഫ് (ചീഫ് എഞ്ചിനീയര്, ഡാം സേഫ്റ്റി, കെഎസ്ഇബി) എന്നിവര് അംഗങ്ങളായ കമ്മിറ്റിയാണ് റിപ്പോര്ട്ട് സമര്പ്പിച്ചത്.
ഡാമുകളുടെ പരമാവധി സംഭരണശേഷിയില് ജലം സംഭരിക്കുമ്പോള് ഉണ്ടാകാനിടയുളള പ്രശ്നങ്ങള് സംബന്ധിച്ച് പ്രത്യേക പഠനങ്ങള് വേണം. ഡാമിന്റെ സുരക്ഷിതത്വം, ഭൂചലന അവസ്ഥയില് പരിശോധിച്ച് ഉറപ്പുവരുത്തേണ്ടതാണ്. ഡാമുകളുടെ ഉയരം കൂട്ടുക, സ്പില്വേ ഷട്ടറുകള് താഴ്ത്തുക ഡാമില് അടിഞ്ഞുകൂടിയിട്ടുളള ചെളി നീക്കം ചെയ്യുക തുടങ്ങിയ മാര്ഗങ്ങളിലൂടെ ഡാമിന്റെ സംഭരണശേഷി വര്ധിപ്പിക്കുന്നതിനെക്കുറിച്ച് ആലോചിക്കണമെന്നും റിപ്പോര്ട്ടില് പറയുന്നു. കേരളത്തിലെ ഡാമുകളും ബാരേജുകളും സുരക്ഷിതമാണെന്ന് വിലയിരുത്തി.
പ്രതികരിക്കാൻ ഇവിടെ എഴുതുക: