കണ്ണൂര്: ബലിദാനികളുടെ മണ്ണിലെ ബിജെപി ജില്ലാ ആസ്ഥാനത്തിന്റെ ഉദ്ഘാടനം ആഘോഷമാക്കാന് ഒരുക്കങ്ങള് തകൃതി. ബിജെപിയുടേയും പോഷക സംഘടനകളുടേയും നേതാക്കളും പ്രവര്ത്തകരും ജില്ലാ ആസ്ഥാനത്തിന്റെ ഉദ്ഘാടനവം വന് വിജയമാക്കാനുളള തയ്യാറെടുപ്പിലാണ്. ഉദ്ഘാടന പരിപാടികളുടെ നടത്തിപ്പിനായി രൂപീകരിച്ച സംഘാടക സമിതി ശക്തമായ പ്രവര്ത്തനങ്ങളുമായി മുന്നോട്ടു പോവുകയാണ്.
ദേശീയ പ്രസ്ഥാനങ്ങള്ക്കു വേണ്ടി പ്രവര്ത്തിച്ചതിന്റെ പേരില് സിപിഎമ്മിന്റെയും മുസ്ലീം തീവ്രവാദ സംഘടനകളുടേയും കൊലക്കത്തിക്കിരയാകേണ്ടി വന്ന 90 ഓളം പ്രവര്ത്തകരുടെ ജ്വലിക്കുന്ന ഓര്മ്മകള്ക്ക് മുന്നില് ഉയരുന്ന ആസ്ഥാനമന്ദിരം കണ്ണൂരിലെ ബിജെപി പ്രവര്ത്തകരുടെ ചിരകാല സ്വപ്നമാണ്. ലോക്സഭാ തെരഞ്ഞെടുപ്പിന് ഏതാനും മാസങ്ങള് മാത്രം അവശേഷിക്കേ, തെരഞ്ഞെടുപ്പു തന്ത്രങ്ങള് മെനയാനുള്ള വാര്റും അടക്കം അത്യന്താധുനിക സജ്ജീകരണങ്ങളോടെ സംസ്ഥാനത്തെ ബിജെപിയുടെ ആദ്യ ഹൈടെക് ഓഫീസാണ് കണ്ണൂരില് സജ്ജമായിരിക്കുന്നത്. നാല് നിലകളിലായി, പത്തായിരത്തിലധികം ചതുരശ്ര അടി വിസ്തീര്ണത്തിലുള്ള മാരാര്ജി ഭവന്റെ ഉദ്ഘാടനം ഈ മാസം 27ന് ബിജെപി ദേശീയ അധ്യക്ഷന് അമിത് ഷാ നിര്വഹിക്കും.
കണ്ണൂര് താളിക്കാവിലാണ് പുതിയ ബഹുനില മന്ദിരം നിര്മ്മാണം പൂര്ത്തിയാക്കിയത്. സംസ്ഥാനത്തെ തന്നെ ഏറ്റവും വലുതും ആധുനിക സൗകര്യങ്ങളുള്ളതുമായ ഓഫീസാണിത്. തെരഞ്ഞെടുപ്പ് വാര് റൂം, വീഡിയോ കോണ്ഫറന്സിംഗ് സംവിധാനം, മിനി കോണ്ഫറന്സ് ഹാള്, പോഷക സംഘടനാ ജില്ലാ അധ്യക്ഷന്മാര്ക്കുള്ള ഓഫീസുകള്, അതി വിശാലമായ ലൈബ്രറി തുടങ്ങി എല്ലാവിധ സൗകര്യങ്ങളുള്ള ഓഫീസാണിത്. ഗ്രൗണ്ട് ഫ്ളോറില് ലൈബ്രറിയും ജില്ലാ ഭാരവാഹികളുടെ ഓഫീസും ഒന്നാം നിലയില് മിനി കോണ്ഫറന്സ് ഹാള്, രണ്ടാം നിലയില് തെരഞ്ഞെടുപ്പു വാര്റൂം. ഇവിടെ മൂന്നു മുറികളിലാണ് കമ്പ്യൂട്ടറുകളും കമ്പ്യൂട്ടര് വിദഗ്ധരും സജ്ജമാവുക. വീഡിയോ കോണ്ഫറന്സിംഗിനും രാജ്യത്തെ ഏത് കോണിലും നടക്കുന്ന സംഭവങ്ങള് അപ്പപ്പോള് തന്നെ വിലയിരുത്താനും ഉന്നത നേതാക്കളുമായി ആശയ വിനിമയം നടത്താനുമുള്ള സൗകര്യം ഇവിടെയുണ്ട്. മൂന്നാമത്തെ നിലയിലാണ് കോണ്ഫറന്സ് ഹാളും സ്റ്റേജും ഒരുക്കിയിരിക്കുന്നത്. ഇവിടെ 250 പേര്ക്കിരിക്കാവുന്ന സൗകര്യമുണ്ട്. പാര്ട്ടിയുടെ സംഘടനാപരമായ പ്രധാന പരിപാടികള് ഇവിടെ വെച്ചാകും നടക്കുക.
9 സെന്റ് സ്ഥലത്ത് രണ്ടര കോടി രൂപ ചെലവിലാണ് മാരാര്ജി മന്ദിരം പൂര്ത്തിയാവുന്നത്. 10,700 ചതുരശ്ര അടിയാണ് കെട്ടിടത്തിന്റെ വിസ്തീര്ണം. ബിജെപി സംസ്ഥാന സെല് കോര്ഡിനേറ്റര് കെ.രഞ്ജിത്താണ് നിര്മ്മാണ കമ്മിറ്റി കണ്വീനര്. ദേശീയ നിര്വാഹക സമിതി അംഗം പി.കെ.കൃഷ്ണദാസ്, ദേശീയ സമിതി അംഗം സി.കെ.പത്മനാഭന്, ജില്ലാ പ്രസിഡണ്ട് പി.സത്യപ്രകാശ് തുടങ്ങിയവരുടെ മേല്നോട്ടത്തിലാണ് നിര്മ്മാണം പൂര്ത്തിയാക്കിയത്.
പ്രതികരിക്കാൻ ഇവിടെ എഴുതുക: