പൂനെ: സമനിലക്കുരുക്ക് അഴിക്കാന് കേരളാ ബ്ലാസ്റ്റേഴ്സ് ഇറങ്ങുന്നു. ഇന്ത്യന് സൂപ്പര് ലീഗില് ഇന്ന് ബലേവാഡി സ്റ്റേഡിയത്തില് നടക്കുന്ന പോരാട്ടത്തില് ബ്ലാസ്റ്റേഴ്സ് പൂനെ സിറ്റിയുമായി മാറ്റുരയ്ക്കും. രാത്രി 7.30 നാണ് കിക്കോഫ്്.
ആദ്യ മത്സരത്തില് കൊല്ക്കത്തയെ തകര്ത്ത് ബ്ലാസ്റ്റേഴ്സ് പിന്നീട് മൂന്ന് മത്സരങ്ങളിലും സമനില വഴങ്ങി. ഈ കുരുക്ക് അഴിച്ച് വിജയം നേടാനാണ് ബ്ലാസ്റ്റേഴ്സിന്റെ ലക്ഷ്യം. നാല് മത്സരങ്ങളില് ആറു പോയിന്റുള്ള ബ്ലാസ്റ്റേഴ്സ് പോയിന്റ് നിലയില് ഏഴാം സ്ഥാനത്താണ്. ജയിച്ചാല് അവര്ക്ക് ഒമ്പത് പോയിന്റാകും.
കഴിഞ്ഞ മത്സരത്തില് ജംഷഡ്പൂരിനെതിരെ രണ്ട് ഗോളിന് പിന്നിട്ടുനിന്നശേഷം ശക്തമായി പൊരുതി സമനില നേടിയതിന്റെ ആവേശത്തിലാണ് ഡേവിഡ് ജെയിംസിന്റെ ബ്ലാസ്റ്റേഴ്സ്. നാലു മത്സരങ്ങളില് തോല്വിയറിഞ്ഞിട്ടില്ല. കളിച്ച മത്സരങ്ങളിലൊക്കെ അവര് ഗോളും നേടി.
അഞ്ചാം സീസണില് ആദ്യ വിജയം ലക്ഷ്യമിട്ടാണ് പൂനെ സിറ്റി ഇറങ്ങുന്നത്. നാല് മത്സരങ്ങളില് ഒന്നില് പോലും ജയിക്കാത്ത അവര്ക്ക് ഒരു പോയിന്റാണുളളത്്. പോയിന്റ് നിലയില് ഏറ്റവും പിന്നിലാണവര്. മൂന്ന് തോല്വികള് ഏറ്റുവാങ്ങിയ അവര് ഒരു മത്സരം സമനിലയാക്കി. കൂടുതല് ഗോള് വഴങ്ങുകയും കുറച്ച് ഗോള് നേടുകയും ചെയ്ത പൂനയ്ക്ക് ഇന്ന് വിജയത്തിനായി കഠിനാദ്ധ്വാനം ചെയ്യേണ്ടിവരും.
പ്രതികരിക്കാൻ ഇവിടെ എഴുതുക: