തിരുവനന്തപുരം: മുന് വിജിലന്സ് ഡയറക്ടര് ഡിജിപി ജേക്കബ് തോമസിനെതിരെ വിജിലന്സ് അന്വേഷണത്തിന് സര്ക്കാര് ഉത്തരവിട്ടു. ജേക്കബ് തോമസ് തുറമുഖ ഡയറക്ടറായിരിക്കെ ഡ്രഡ്ജിങ് ഉപകരണങ്ങള് വാങ്ങിയതില് ക്രമക്കേട് നടന്നതായി ധനകാര്യ വകുപ്പ് പരിശോധനാ വിഭാഗത്തിന്റെ കണ്ടെത്തലിന്റെ അടിസ്ഥാനത്തിലാണ് നടപടി.
മുഖ്യമന്ത്രിയാണ് കേസ് രജിസ്റ്റർ ചെയ്ത് അന്വേഷിക്കാൻ ഉത്തരവിട്ടത്. ഇതു സംബന്ധിച്ച ഫയല് ഇന്നു വിജിലന്സ് മേധാവി ബി.എസ് മുഹമ്മദ് യാസിനു കൈമാറുമെന്നാണ് സൂചന. ധനകാര്യവകുപ്പ് പരിശോധനാ വിഭാഗത്തിന്റെ റിപ്പോര്ട്ടില് ജേക്കബ് തോമസിനെതിരെ അന്വേഷണത്തിന് അന്നത്തെ ചീഫ് സെക്രട്ടറിയായിരുന്ന എസ്.എം. വിജയാനന്ദ് ശുപാര്ശ ചെയ്തിരുന്നു. ഇതില് ഡയറക്ടര് ജനറല് ഓഫ് പ്രോസിക്യൂഷന് മഞ്ചേരി ശ്രീധരന് നായരോട് സര്ക്കാര് നിയമോപദേശവും തേടിയിരുന്നു.
2009 മുതല് 2014 വരെ ജേക്കബ് തോമസ് തുറമുഖ വകുപ്പ് ഡയറക്ടര് ആയിരിക്കെ ഡ്രഡ്ജര് വാങ്ങിയതില് 14.96 കോടിയുടെ ക്രമക്കേട് ഉണ്ടായതായാണ് ധനകാര്യ പരിശോധനാവിഭാഗം കണ്ടെത്തിയത്. സര്ക്കാര് അനുമതിക്കുശേഷം രേഖകളില് മാറ്റം വരുത്തിയതായും ടെന്ഡര് വിവരങ്ങള് വിദേശ കമ്പനിക്ക് നേരത്തേ തന്നെ കൈമാറിയതായും റിപ്പോര്ട്ടില് പറയുന്നു. 2014 ല് ഇക്കാര്യം വിജിലന്സ് അന്വേഷിച്ച് ക്രമക്കേടില്ലെന്ന് റിപ്പോര്ട്ട് നല്കിയിരുന്നു. ഈ അന്വേഷണം നടക്കുമ്പോള് ജേക്കബ് തോമസ് തന്നെയായിരുന്നു വിജിലന്സ് എഡിജിപി.
പ്രതികരിക്കാൻ ഇവിടെ എഴുതുക: