കോഴിക്കോട്: ശബരിമലയിലെ സമരത്തില് നിന്നും ബിജെപി പിന്നോട്ട് പോയിട്ടില്ലെന്നും സമരം ശക്തിപ്പെടുത്തി സെക്രട്ടറിയേറ്റിന് മുന്നിലേക്ക് വ്യാപിപ്പിക്കുകയാണെന്നും ബിജെപി സംസ്ഥാന അധ്യക്ഷന് അഡ്വ.പി.എസ്. ശ്രീധരന്പിള്ള. യാഥാര്ത്ഥ്യം മനസ്സിലാക്കാതെ ബിജെപി സമരം നിര്ത്തിയെന്ന് പറയുന്ന മുഖ്യമന്ത്രി പിണറായി വിജയന് വിഡ്ഢികളുടെ സ്വര്ഗത്തിലാണെന്നും അദ്ദേഹം പറഞ്ഞു. കോഴിക്കോട് ജുഡിഷ്യല് ഒന്നാം ക്ലാസ് മജിസ്ട്രേറ്റ് കോടതിയില് ഹാജരാകാനെത്തിയ കെ. സുരേന്ദ്രനെ സന്ദര്ശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
ശബരിമല വിഷയത്തില് സിപിഎമ്മുമായി ബിജെപി ഒത്തുതീര്പ്പുണ്ടാക്കിയെന്ന പ്രചാരണം ഈ നൂറ്റാണ്ടിലെ ഏറ്റവും വലിയ കളവാണ്. ബിജെപി സമരം നിര്ത്തിയെന്ന പ്രചാരണം മാധ്യമസൃഷ്ടി മാത്രമാണ്. ശബരിമല വിഷയത്തില് ബിജെപി നടത്തിയ എല്ലാ സമരങ്ങളും പൂങ്കാവനത്തിന് പുറത്തായിരുന്നു. ശബരിമല കര്മസമിതിയുടെ സമരത്തിന് ബിജെപി പൂര്ണ പിന്തുണ നല്കുന്നുണ്ട്. അടിയന്തരാവസ്ഥക്കാലത്തിന് തുല്യമായ മാധ്യമ നിയന്ത്രണമാണ് സംസ്ഥാനത്ത് നിലനില്ക്കുന്നതെന്നും ശ്രീധരന്പിള്ള കൂട്ടിച്ചേര്ത്തു.
പ്രതികരിക്കാൻ ഇവിടെ എഴുതുക: